Taburê Enternasyonalî yê YPGyî ra şerwanê îngilizî Xebat Kuyeyî derheqê tecrubeyanê xo yê Şorişê Rojawanî û çimdarîyan de ANFyî rê qisey kerd. 

Xebato ke serrêke û nêm ra verî ameyo Rojawanî da zanayene ke Serfîrazîya Kobanê ra dima ey nameyê Rojawanî eşnawito. Xebatî vat: ''Raştîyê şorişî ma rê nêameyê vatene. Medyaya rojawanî (Ewropa) qala ci nêkerda ke Rojawan de merdimî seba çita şer kenê, îradeyêkê senînî mojnenê. Embazê mino ke Reqa de vera DAÎŞî şer kerdêne mi rê detayî dayî. Mi fam kerd ke Rojawan de çita qewimîyeno. Tîya de şar sîstemêkê demokratîkî awan keno, têkoşînê azadîya cinîyan û ekolojî keno.''

Xebatî îfade kerd ke teberî ra dîyayîşê raştîyanê Şorişê Rojawanî zehmet o û vat: ''Coka merdimî ganî bêrê tîya û bivînê. Tîya de ewnîyayîşê min ê bi şorişî vurîya. Zaf bitesîr o ke merdim tîya de bibo parçeyêkê şorişî. Têkoşîn û cuya tîya seba Ewropa çîyêko newe yo. Çunke tîya de merdimî girîngîye danê ameyoxî ser û seba ameyoxê xo heqanê demokratîkan wazenê. Ma enternasyonel ê la tîya de ma zî sey parçeyê şorişî hesibîyenê. Ma rê zaf ecêb o ke merdimî tîya de pîya seba neteweya demokratîke xîret kenê. 

Ez venga her kesî dana ke bêrê têkoşînê Şorişê Rojawanî nêzdî ra bivînê. Tîya de zaf çîyî est ê ke ma bimusê û welatanê xo de sey şorişî bîyarê ca.''