Şehba û taxa xoverdayoxe Şêxmaqsûdî ya Helebi raştê ambargoyanê werd, derman û ekomomîkan ê rejîmê Şemî yenê.

Rejîmê Şamî 4 serrî yo Şêxmaqsûd, Eşrefîye û Şehba de ambargoyî giranêr kerdî. 13ê adare ra nata hêzê Tugayê 4. yê rejîmî nêverdenê ke şar nan bigêro. Reyna hêrînayîşê ard, tup û gazî zî qedexe yê. Nê cayan de firinî zî qefilnaye yê.

Taxê Şêxmaqsûd û Eşrefîyê taxê Helebî yê, nêzdîyê Şehba yê û pê tewirê xo yê têkoşînî nêzdîyê Îdareyê Xoserî yê. Nê taxî hetê YPG û YPJyî ra 2016 de ameybî azadkerdene.

Hemserekê Meclîsê Şarî yê Şêxmaqsûdî û Eşrefîyê Muhammed Şêxoyî pare kerd ke nê taxan wextê xoverdayîşî de rejîmî ra paştîyêke nêdîye. Dima ke nê taxî ameybî azadkerdene dewleta tirke û cergê ci nêeşkayî Heleb îşxal bikerê.

Adara 2018î de dima ke Efrîn ame îşxalkerdene seba ke şar şoro Şehba YPG û YPJyî peymanêke îmza kerde. Goreyê peymane taxê Şêxmaqsûd û Eşrefîyê û 8 taxê bînî teslîmê rejîmê Şamî ameyî kerdene. Nika nê taxan de tewr tay 200 hezar kesî ciwîyenê û nînan ra tay kesî zî efrînij ê. Şêxmaqsûd û Eşrefiyê de binê sîwana Meclîsê Şarê Demokratîkî de 41 komunî estê. Tugayê 4. yê rejîmî nêverda ke nê komunan erkê xo bikerê.

13ê adare ra nata şar bênan o

13ê adara 2022yî de hêzanê Tugayê 4. kamyonêka şekerî daye guleyan ver û nê serebûtî ra dima zî werde, derman û sotemenî nêkewtî Şêxmaqsûd û Eşrefiyê.

Hemserekê Meclîsê Şarî yê Şêxmaqsûd û Eşrefiyê Muhammed Şêxoyî bale ante ambargoyî ser û vat: ''13ê adare ra nata nan nêkewt taxa ma. No sîyasetê ambargoyî 4 serrî yo dewam keno û 2 serranê peyênan de zî zêdîyayo. Warê peydakerdişê tup, ardan de astengîye est a. 2012-2013 de zî Şêxmaqsûd û Eşrefiyê nan çin bi. La şar şi ardan bigêro û raştê bombardumanî ame. O çax zî nê şerî sereyê xo nêrard war. Rejîmî wazeno ke şar vera Meclîsê ma sere wedarno. La şar yeno ma rê vano 'Ma teslîmê rejîmî mebê.' ''

Goreyê agahîyanê ke şarê herême dayê, rejîm xo sey mesuldarê nê ambargoyî nêmojneno û mesuldarîye erzeno milê tugayê 4. ser. La Tugayo 4. hêzê leşkeran ê rejîmê Şamî yo.

Rejîmê Şamî Qanûnanê Sezarî ra zî kurdan û Îdareyê Xoserî mesuldar vîneno. Nê qanûnî Sûrîye de benê sebebê xesaranê pîlan û şar hêdî nêeşkeno çîyêk bikero. Îdareyo Xoser zî xîret keno ke herêmanê xo de nê xesarî bikêmîno. Qanûnanê Sezarî ra zî Şam û Amerîka mesuldar ê.