Babîyê ey fermandarêkê Hêzanê Zerevanî yê PDKyî bi ke Şingal de êzidîyî war verdayî remayî. Rustem Başûr zî tewrê têgêrayîşê azadîye bi, beşdarê hemleya xelisnayîşê Şingalî bi. O hemleya xelisnayîşê Minbicî de birîndar bi.

Rustem Başûr dewa Çemankê ya Dihokî de mîyanê keyeyêk de ke dûştê PKKyî bi dadîya xo ra beno. 2014 de wexto ke 12 hezar kesî yê PDKyî Şingalî ra şinê babîyî zî remeno û înan êzidîyî mîyanê lapanê DAÎŞî de verdayî. Bi nê hawayî cuya Rûstemî vurîyena. Rustem tewrê YPGyî beno û sey şerwanêkî verê xo dano Şingalî.

Rustem wina qala ê rojan keno: ''Dewa ma û keyeyê ma duştê PKKyî bîyî. Gerîlayî ge ge ameyêne şîyêne dewe. O çax înan zaf bala mi antêne. Mi qijîya xo de bire daye ke biba gerîla. La rayîr de hêzanê Zêrevanî ez tepişta. Babîyê mi fermandarê înan bi. Seba ke mi PKKyî ra hes kerdêne ez eşta zîndanî, mi rê teda kerde, dadîya mi rê nêngî çînayî.

Babîyê mi wextê hêrişanê DAÎŞî de sey fermandarêkê Zêrevanî Şingalî ra xo apey ant. Ez naye ra zaf aciz bîya. PDKyî reyna kurdan rê îxanet kerd û Şingal war verda. Nê çîyî fikrê mi û fikrê şarê Başûrî vurna. Mîyanê komelî de persê cidîyî qewimîyayî. Mi bire daye ke ez tewra Têgêrayîşê Azadîye biba. Şingal parçeyêkê Kurdîstanî bi la hêzanê PDKyî Şingal têna verdabi. Mi o çax şerwanê YPG-YPJyî dîyî, gerîlayî dîyî le şîyêne Şingalî. Ez tewra YPGyî bîya, mi perwerde girewt, ez derbazê Şingalî bîya. Mi mîyanê hemleya xelisnayîşê Şingalî de ca girewt.''

Rustem hemleya xelisnayîşê Minbicî de birîndar bi, hînî nêeşkeno rayîr a şoro. Rustemî vat: ''Mi rê rûmetêk o ke mi seba komelê xo parçeyêkê xo dayo. Ez nika bi qelema xo xizmetê şarê xo kena û têkoşînî kena. Nika ez nasnameyê qedexekerdeyî û ziwanê Kurdîstanî ser o cigêrayîşan kena.''

Rustem Başûrî ard ziwan ke sey gazîyêkê Rojawanî serran ra dima ey babîyê xo de qisey kerdo. Rustemî vat: ''Verî mi pê telefonî babîyê xo de qisey kerd. Verî ke ez bîya şerwan, wayê mi zî pêşmerge bîyî la wexto ke ez tewra YPGyî bîya ê pêşmergetîye ra cîya bîyî. Mi eşnawit ke babîyê mi hema zî pêşmerge yo. 2014 ra nata mîyanê Zêrevanî de yo. Babîyê mi, mi rê vat 'Ez zanena to seba welatî parçeyêkê xo dayo la welatî çi dayo to.' Yanî waştêne vajo ke 'Pereyî danê to.' Mantiqê înan wina yo.''

Rustemî da zanayene ke Barzanîyî xizmetê dewleta tirke kenê û vat: ''Ganî şarê Başûrî vera îdarekaranê PDKyî sere wedarno. Ez venga pêşmergeyan dana ke wa bibê wayîrê wijdanî. Barzanîyan qetî yewîya kurdan nêpawita. Pêşmergeyê rûmetênî ganî tewrê nê şerî bibê.''