Wexto ke Rayberê Şarê Kurdî Abdullah Ocalan 20 serran Sûrîye de mendêne şarê herême xeylêk reyî ey reyde pêvînayîş kerdbi. Nînan ra yew zî Ramadan Yusif Omer o.

Omerî ANFyî rê qisey kerd û qala ci kerde ke ey senî Rayberê Şarê Kurdî şinasnayo.

Omerî da zanayene ke ey verî Mustafa Gulo, Duran Kalkan, Elî Hesen û Ednan şinasnayî dima zî PKK şinasna û bi nê hawayî tewrê karî bi. Omerî vat: ''Mi têgêrayîşê sey PKKyî verî qetî nêdîbî. Apogîrî tim mîyanê şarî de bîyî. Têkilîya ma ya bi înan hêz da mi. Verî şarê tîya hetê Barzanîyan de bîyî la ê sey PKKyî nêbîyî. Wexto ke ma vatêne partî merdimê gravatkerde û axayî ameyêne ma vîrî. Labelê PKK na hişmendîye rijnaye.

Wexto ke embazan vat ke ma do şorê warê Rayberîye, ma bawer nêkerd. Ma zaf bikelecanî bîyî. Rojêke m rayîrê Şamî de bîyî. Rayberîye her kes kom kerdbi. Ma rê ame vatene ke ma do bi Rayberîye reyde pêvînayîşî bikerê. Nişka ra ber abi û Rayber Apo kewt zere. Rayber Apoyî bi baldarî goş da şarî ser. Rayber Apoyî bi giranî ser de vindertêne û vatêne ke ganî şar xo bivurno. Ey vatêne heta ke merdimî xo û keyeyê xo mevurnê nêeşkenê Kurdîstanî azad bikerê, erdê xo bipawê û azad bikerê.''

Omerî bale ante perwerîya Ocalanî ya bi şehîdan ser û vat: ''Bala mi ante ke wexto ke Rayber Apoyî qala şehîdan kerdêne nameyê înan, cayê bîyayîşê înan, cayê şehdetê înan vatêne. Ney zaf tesîrê mi kerd. Ma kesê sey Rayber Apoyî qet nêdî. Azadîya fîzîkî ya Rayber Apoyî do bi keda şarî dîyar biba. Rayber Apo nêbo Kurdîstan zî ma zî nêbenê.''