Welatperweranê Rojawanî ra Loma Mehmud Hisên û mêrdeyê ci Îsmaîl Ferhoyî ANFyî ra qala ci kerde ke înan senî PKK şinasnayo û Rayberê Şarê Kurdî Abdullah Ocalan dîyo.

Loma da zanayene ke serranê 80an de endamê PKKyî ameyêne keyeyê înan û vat: ''Keyeyê ma nêzdîyê sînorê Vakurî bi. Her roje vengê pêkewtişan ameyêne. Wexto ke embazî ameyî keyeyê ma pê hesiyayê ke çi qewimîyeno. Embazî Mustafa Gulo û Xebat Tirbêspîyê ameyê keyeyê ma û înan qala Rayber Apoyî kerdene. Ma wina PKK şinasna. Ma fam kerd ke Rayber Apoyî heqê şaran pawitêne. Seba ke ma pê embazan bawer bîyî ma berê xo înan rê akerd. Rejîmê Sûrîye ma rê îşkence kerd û domanê ma tepiştî, la ma Apogîrî war nêverdayî. Embazê cinîyî zî ameyêne keyeyê ma. Têkoşînê nê cinîyan mi rê zaf tesîr kerdêne.

Keyeyê ma Tirbêspîyê de bi, ez û mêrdeyê xo seba vînayîşê Rayberîye şîyî Lubnan. Şar sey girseyan şîyêne uca. Otobusê Lubnanî dore bi dore bîyî. Nê dîmenî hîsê azadkerdişê Kurdîstanî dayêne. Rayberîye yew pancera ra venga şarî da. Şar pê her çekuya Rayberîye bawer kerdêne. Ma zanayêne ke o Rayberê şaranê bindestan bi. O qetî seba xo nêciwîya. Heta ke o azad bi ma do meydanan de bibê.'' 

Mêrdeyê Loma Îsmaîl Ferhoyî 1974-75 de hêrişanê dewleta tirke ra Mêrdînî ra koçê Qamişloyî kerdo. Ferhoyî vat: ''Mi televîzyonî ra nameyê Apogîran eşnawitbi. Rojêke di embazî ameyî û înan vat wazenê şorê Akademîya Mahsum Korkmazî. Mi înan rê nasnameyî peyda kerdî û ma şîyî Şam. Mi tim embazan rê rêberîya rayîran kerde. Rojêke leşkeranê rejîmî rayîrê ma girewt. Mi înan rê vat ke ez lajê xo bena leşkerîye. Leşkeranê rejîmî ma ra xerac girewt. Mi 6 embazî berdî Lubnanî. Dima Rayberîye reyde ma nan werd.

Mi warê Rayberîye de Sakîna Cansize şinasnaye. A newe zîndanî ra vejîyabi. Di rojan ez hetê ci de menda. A raştê zaf îşkenceyan amebî. Ez şermayêne verê ci de qisey bikera çunke aye sey cinîye sere wedaritbi û çeke girewtbî xo destî.

Rojêke embazan xebere daye. Ganî mi Hesekê ra 12 kesî berdêne bi warê Rayberîye. Ma yew roje depoyêk de xo nimit. Rixmê tehlukeyan zî mi ê berdî warî. Ma pabeyê Rayberîye vindertî. Rayberîye ame û selam da. Ey mi rê pers kerd ke ez babîyê Zerdeşt û Jîyane ya yan nê. Ma wina dest pê qiseykerdişî kerd. Ma pîya fotografê xo girewt.''