PDK Tirkîya reyde sey Herêmanê Pawitişî yê Medya vera Rojawanî zî ablûqa zêdîneno. PDKyî, sînorê Rojawanî de hûmara qereqolan 8 ra zêdînaye kerde 66. Hêzanê taybetan ê PDKyî kamerayê termalî û wesayîtê zirxînî sewqê herême kerdî û xeta sînorî de dewleta tirke reyde baregehî ronayî.

Wextê Şorişê Rojawanî de PDKyî, sînor de hûmara qereqolan kerdbî 20 û nîsane-gulana 2014î de zî mabênê Dêrik û sînorê Başûrî de hendekî viraştî. Wextê hêrişanê DAÎŞî de artêşa Iraqî, sînorê Dêrikî ra heta Berê Sînorî yê Rabîa remabî. PDKyî zî o çax Şingal war verda û rema. DAÎŞî Berê Sînorî yê Rabîa û qezaya Rabîa vistbî destî. Şerwananê YPG û YPJyî 3ê tebaxa 2014î de qismêkê Rabîa destê DAÎŞî ra xelisnaye. 30ê êlula 2014î de zî pê beşdarîya pêşmergeyan Rabîa û Berê Sînorî bi temamî ameyî xelisnayene.

Şerwanan dima Rabîa pêşmergeyan rê verdaye û derbazê Rojawanî bîyî. Bi nê hawayî kontrolê Pêşxabûr, Rabîa û Berê Sînorî yê Rabîa kewt destê pêşmergeyan. Referandumê xoserîye ra dima, teşrîna verêne ya 2017î de, artêşa Iraqî sere de Kerkûk kewte xeylêk waran. PDKyî newe ra Rabîa war verdaye û heta dewa Mahmudîye xo apey ant.

PDK 2017 ra nata Pêşxabur, dewa Mahmudîye kontrol keno. Xeta sînorî ya Qamişlo û Şingalî destê Haşdî Şabî, artêşa Iraqî de ya. 

Dima ke PDKyî ra Nêçîrvan Barzanîyî Anqara de dewleta tirke reyde pêvînayîş kerd, Rojawan de qereqol û noqtayê çimdarîyî viraştî. Qereqolanê neweyan û verênan rê hêzê leşkerî û çekê giranî ameyî sewqkerdene. Nê qereqolî pê kamerayanê termalan û wesayîtanê teknîkan ameyî dekerdene.

Îqtîxbaratê MÎT û pDKyî baregehanê El Qale û Şilikîyê de ameyî cakerdene. Nê baregehî şarê Rojawanî pers keno. Koyê Bêxêrî yê Başûrî de zî baregehêko ke tira teyarayê dewleta tirke perenî, virazîya.

Dima ke PDK û hukmatê Kazimîyî waştişê Tirkîya ser o Peymana Şingalî ya 9ê Teşrîna Verêne ya 2020î viraşte, sînorê Rojawanî de ablûqa zêdîyaye. PDKyî newe ra kanûne de, hêzê taybetî sewqê herêma sînorî kerdî û tede qereqolî zêdînayî. Tewr peyên dewa Mahmudîye de 3 qereqolê neweyî virazîyayî. Bi nê hawayî nika sînorê Rojawan û Başûrî de 66 qereqolî û bi seyan mewzîyî bîyî. Yanî ewro sînorê Başûr-Rojawanê Kurdîstanî bi temamî binê ablûqa de yo.

PDKyî çend reyî Berê Sînorî yê Sêmalka qefilna û vera ci ambargo kerd. Hukmatê Kazimîyî zî ge ge Berê Sînorî yê El-Welîdî qefilneno û ambargo keno. 

Hukmatê Kazimîyî çarçewa Peymana Şingalî de, sînorê Şingal û Rojawanî bi têlan û kamerayan qefilna û nika dêsê bi dergîya 250 km û bi berzîya 3 metre û 75 cm virazeno.

Xora PDK hêrişanê dewleta tirke yê vera Herêmanê Pawitişî yê Medya rê hemkarîye keno. Bi nê hawayî dewleta tirke pê şuxilnayîşê PDK û hukmatê Kazimîyî têkilîya Şingal, Rojawan û Herêmanê Pawitişî yê Medya birnena.