Dewleta tirke verî bi rayîrê OSO, El Nûsra û cerganê DAÎŞî mudaxeleyê Sûrîye û Rojawanê Kurdîstanî kerd û dima zî 2016 de dest pê îşxalî kerd. Dewleta tirke ya ke Îdlîbî ra heta Efrîn, Girê Sipî û Serêkanîyê îşxal kerdo, armanc kena ke demografîya herême bivurna. 

Wextê peyênî de îqtîdarê AKP-MHPyî pare keno ke ê do koçberan Sûrîye do apey bişawê. Tewr peyênî Erdoganî vatbi ke ''Ma do mîlyonêk sûrîyeyîjan bişawê.'' La dewleta tirke plan kena ke koçberan herêmanê înan de nê herêmanê kurdan de cabikera û bi nê hawayî demografîya herême bivurna.

Endamê Heyetê Îdareyî yê Herêma Firatî Nîhad Ehmedî derheqê babete de ANFyî rê qisey kerd.

Ehmedî da zanayene ke edewleta tirke Rojawan de bi terzê 'Sancaxê Îskenderunî' têgêreno û seke Hatay (Îskenderun) îlaweyê erdê xo kerdo, wazena Rojawan zî îlaweyê erdê xo bikera. Ehmedî vat: ''Eke nê bi mîlyonêkî merdimî bêrê ardene tîya û nînan ra yew zî tîya ra nêbo o çax tehluke dest pêkena. Tirkîya xora estbîyayîşê xo înkarê kurdan ser de ronayo û paştî dana cergan. Ewro zî hêrişê Tirkîya dewam kenê. Nê merdimî do kamca de ca bibê. Efrîn de demokrafî ha yena vurnayene, tede cergî ameyê cakerdene.

Kesê ke na herême ra nîyê, wa erdê xo de bêrê cakerdene. Ganî koçber û multecîyî abigêrê erdê xo ser. Ewro Erdogan multecî û koçberan seba weçînayîşî şuxilneno. Eke nê merdimî waranê xo yê verênan de nêrê cakerdene tehlukeyêko pîl do biqewimîyo. Ganî huqûqnas, huqûqo mîyannteweyî û rayaumûmîye na babete de çîyêkî bikerê. û dewleta tirke asteng bikerê.''