Paketa Hukmîya 10ine Meclîsî ra derbaz bîye. Huqûqnas Ercan Kanarî derheqê babete de ajansê ma rê qisey kerd.

Kanarî dîyar kerd ke pênasekerdişê panete bi ‘reformî’ raşt nîyo û pare kerd ke na pakete do cezayan bizêdîna. 

Kanarî da zanayene ke pakete bi qijî zî tepişteyanê sîyasîyan rê do fayde nêkera, eqsê ci veradîyayîşê tepişteyanê nêweşan zehmet kerdo. Kanarî vist vîrî ke seba veradîyayîşê tepişteyanê nêweşan ganî Dezgehê Tipê Edlîyî ra rapor bêro girewtene û no zî zehmet o. Kanarî vat: ‘’Dezgehê Tipê Edlîyî bi temamî binê kontrolê îdareyê zîndanî de yo.’’

Kanarî ard ziwan ke Paketa 10ine vera muxalîfan paketa teda ya û vat: ‘’Nê wextî de  qalê prosesê haştîye yeno kerdene. La yew eleqeyê na pakete bi çareserîye çin o. Eqsê ci na pakete neçareserîye pîlêr kena û haştîye rê xizmet nêkena. Yanî ganî îqtîdarî ra seba haştîye game nêra pawitene. 

PKKyî çek verdayo la operasyonî dewam kenê. Wan de 6 serrî yo destûrê eşkerayîya çepemenîye zî nêno dayene, 410 hezar ra zafêr tepişteyê sîyasîyî est ê. Paketa Hukmî ya Desine seba tepişteyanê edlîyan o. Ci rê vanê ‘paketa reformî.’ La tede cigêrayîşê heqanê demokratîkan yeno cezakerdene. 

Bi na pakete ame dîyene ke îqtîdar samîmî nîyo. Nîyetê AKPyî haştîye nîyo; o wazeno ke bi polîtîkayanê teda yê klasîkan îqtîdarîya xo rê dewam bikero.’’