DEM Partî bi wesîleya roşanî xeylê bajaran de şarî de ameye têhet. Zîyaretan de roşan ame bimbarekerdene û derheqê rojdemî de ame qiseykerdene.

Wan de bimbarekkerdişê roşanî rêxistina DEM Partî de ame kerdene. Endama Heyetê Îmraliyî Pervîne Buldan û xeylê kesî tewrê zîyaretê roşanî bîyî.

Hemserekê DBPyî yê Wanî Cemal Demirî ke tîya qisey kerd  vengdayîşê Rayber Apoyî yê 27ê sibate sey firsetêkê tarîxî name kerd û vat gerek no vengdayîş bêro wayîrvejîyayene.

Hemşaredarê Bajarê Pîlî yê Wanî Abdullah Zeydanî zî roşanê şarî bimbarek kerd û vat semedê azadkerdişê Rayber Apoyî û heme tepişteyanê sîyasîyan têkoşînê înan do dewam bikero.

Pervîne Buldan zî roşanê şarî bimbarek kerd û nê vatî: “Ma dest pê prosesê neweyî kerd ke ma pêro tede yê û tira hêvîdar ê. Vengdayîşê Haştîye û Komelê Demokratîkî bi sebebê heyecanê pîlî. Birêz Ocalan her pêvînayîş de şarê ma rê selamanê xo şaweno û vano ma nê prosesî ra bi hêvî û coşî do vejê. Pêvînayîşan de ma hîşyar keno vano ‘Na haştîye do haştîya bianore bi. Çîyo ke peynî do bibo vernî de mekerê.’ Coka wa zerrîya şarê ma rehet bo. Eke haştîya bianore mebo, na haştîye do mebo. Paştîya ma nê prosesî ra pêt a. Cunke Birêz Ocalan tede yo.

Ez hêvî kena roşan bibo wesîleya wayûbiratîye û azadîye. Persê sey qey gamî nînê eştene? Qey paketa hukmî de ca nêdîya ma? Ma sey cewabê nê persan şarê xo ra nê rîca kene; bineyna sebir, bineyna wext lazim o. Ez wazenê nê îfade bikerî demê nizdî de do şertê serbestxebityayîşî yê Birêz Ocalanî û azadîya heme embazanê ma bêra caardene û şarê kurdî bieşko azad qala ziwan, nasname kulturê xo bikero. Nê prosesî de berpirîyarîya ma pêrune gird a. Gerek ma pêro wezîfe û berpirsîyarîyanê xo bîyarê ca.”

Hetê bînî ra Îzmîr, Adana, Antalya, Mersin, Osmanîye û Hatay de îdarekarê DEM Partî şarî de ameyî têhet.