Îdarekara Komeleya Heqanê Merdiman a Cizîre Evîne Cuma eşkerayîya Erdoganî ya serê multecîyanê sûrîyeyîjan ANFyî rê ercnaye.

Evîne Cuma ard ziwan ke eşkerayîyê Erdoganî vera qanûnanê heqanê merdiman ê mîyanneteweyîyan o û vat: ''Ganî multecîyî goreyê qanûnan bierşawîyê erdê xo. Hetê bînî ra Sûrîye de şer hema nêqedîyayo. Coka qanûnî nîyo ke nê merdimî bierşawîyê.  Erdogan wazeno nê merdiman bierşawo herêmanê îşxalkerdeyan ê ke şarê ci bi zorî ameyo koçkerdene. Tedaya sûrîyeyîjan yena kerdene ke wa abigêrê tîya. La wayîrê nê herêmanê îşxalkerdeyan est ê û zafê înan kurd ê. Waştişê Erdoganî do mabênê kurdan û ereban de şer vejo.

Tek armancê nê waştişî no yo ke Efrîn, Serêkanîyê û Girê Sipî de demografî bêra vurnayene. Dewleta tirke cara sere de Efrîn de xeylêk herêmanê Sûrîye de vurnayîşê demografîkî kerdî. Nika zî qala nê mîlyonêkî merdiman yena kerdene. Erdogan bi nê hawayî wazeno ke vurnayîşê demografîkî mende bikero û dima zî nê herêman îlaweyê Tirkîya bikero. Nika herêmanê îşxalkerdeyan de pereyê tirkan şuxilîyeno, perwerde bi tirkî dîyeno, alaya tirkan her ca de yena dardekerdene.''