Keyeyanê gerîlayanê ke netîceya xayînîya PDKyî de şehîd bîyê ANFyî rê qisey kerd û waşt ke ganî vera na xayînîye têkoşîn bêro pîlkerdene.

Gerîla Xoşnav (Adnan Êmo) 1976 de qezaya Kaxirî ya Efrînî de dadîya xo ra bîyo. Xoşnav hema ke doman bi waştêne ke tewrê gerîlayan bibo la seba ke hema qij o ci rê xebatê herême dîyenê. Xoşnav 1993 de tewrê têgêrayîşê azadîye beno û dima verê xo dano koyan. 

 Dadîya Xoşnavî Fatma Seydo wina qala ê rojan kerde: ''Ey di serran Heleb de karî kerdî. Rojêke ame û vat ke o do şêro. Ma ci rê kincî deştî, şayîyêke viraşte. Ma pê govendan o şawit. O zaf jîhat û bidîsîplîn bi. Ey hetkarîya her kesî kerdêne. Ma rê nefesêk bi.''

Xoşnav 1995 de warê Garê de herêma Sêdarê de hêrişêk de şehîd bi.

Dayîke Fatma vat: ''A roje varan zaf varayêne. Wexto ke şehadetê ci amebi îlankerdene hêzê BAASî eşt keyeyê ma ser. Mi înan rê vat '3 lajanê ma şima rê leşkerîye kerde, wa yew zî kurdan rê bikero.' A roje qetî ma vîrî ra nêşina. Dejî a roje dest pêkerd.

Adnan pê destê PDKyî şehîd bi. Domanê ma 15 serre bîyî, PDKyî rê xebitîyayêne. Ma hûrmetê PDKyî kerdêne. La înan ma rê wina kerdo. Êyê ke cigêrê ma vêşnayo wa cigêrê înan zî bivêşê. Kesê ke kurdayetîye, Kurdîstanî wazenê senî domananê ma qetil kenê. Ê domananê ma qetil kenê, gonîya ma şimenê. Ganî ma vera înan vinderê. Xayînîye nêqedîyaye. Ewro zî domanê ma yenê qetilkerdene. Seba ke zerrîya dadîyanê bînan nêvêşa ganî ma vera înan têbigêrê.''