Keyeyanê gerîlayan ê Rojawanî yê ke netîceya xayînîya PDKyî de merdimê înan şehîd bîyê, vat ganî vera xayînan têkoşîn bêro pîlkerdene û înan ra hesab bêro persayene.

Gerîlayê ke hêrişê xayînîye yê PDKyî de şehîd bîyî ra yew zî Mustafa Ehmed (Dîyar) o.  Mustafa 1971 Efrîn de ameyo dinya û keyeyêko welatperwer de bîyo pîl. Hema serranê xo yê wirdîyan de Têgêrayîşê Azadîye yê Kurdan nas kerd. Mustafayo ke mîyanê karê kulturî de ca girewtêne 1993 de tewrê têkoşînê azadîye  bi. Bado ke 3 serrî Efrîn û Halep de falîyetanê rêxistine de mend 1996 de şi Başûrê Kurdîstanî û 1997 de hêrişê hêzanê PDKyî yê vera Zapî de pîya bi 9 embazanê xo şehîd bi.

Fîyale Ehmed wina qala birayê xo Şehîd Dîyarî kerd: ''Ma 8 wayûbirayî bî, tewr pîlê ma o bi. Her warê cuye de têkoşer bi. Wayîrê heme wayûbirayanê xo vejîyayêne ma pawitêne. Embazanê xo rê zî wina bi. Pîya bi embazanê xo ameyêne têhet û kitabî wendêne. Senî ke xo aver berdêne embazê xo zî aver berdêne. Bado ke lîse qedîna ganî leşkerîye bikerdêne la ey vat o do çirey rejîmî rê leşkerîye mekero. Dima ra ma eşnawit ke tewrê perwerdeyê Têgêrayîşê Azadîye bîyo. Badê 25 rojan ame çend saetî cayê ma de mend û vat ey qerarê tewrbîyayîşê têgêrayîşî girewto.''

Fîryal Ehmed ard ziwan ke birayê ci 1996 de verê xo dayo koyanê Kurdîstanî û nê vatî:  ''Wextêk Şêrawa de dima ra waranê Efrîn û Bilbilê de xebatî kerdî. Dima ra şi Heleb. Rojêke venga ma da. Ma pêro pîya şîyî Haleb o dî. Ma rê vat o do hinî têkoşînê xo koyanê Kurdîstanî de rayra bero û ma ra xatir waşt. Wextêk cuwa pê mektubêk û fotografê ci ame. Mektûb de vatêne resayo cayê xo, Zap de yo û xebatî rind şinê.'2

Fîyale derheqê hêrişê xayînîye ke bi sebebê şehadetê birayê ci de zî nê vatî:  ''Hêzanê PDKyî hêrişê Zapî kerdbi. Ma eşnawit ke birayê mi pa 9 embazanê xo ya şehîd bîyo. Birîndarê ke pêkewtişan ra xelisîyaybî estbî. Gama ke ê ameyî Sûrîye ma ey zîyaret kerdî. Înan ma rê qala qewimîyayîşan kerde.''

Fîryale bale ante xayînîya PDKyî ya ke çirey nêqedîyena ser û vat: ''Ê qale de tim kurd ê la çîyo ke kenê eleqaya ci bi kurdîtîye çîn a. Eke ê kurd bîyênî wayûbirayê xo nêkiştêne.  Bi serran o wazenê şerê wayûbiratîye vejê.  Her kes zano ke dewleta tirke dişmenê kurdan a. înan destê xo dayo dişmenê kurdan. Tim wazenê ma biqedînê.  Vera kurdan û fîkranê înan şer kenê. PDK zî kerdişanê dewleta tirke keno. Gerîlayanê ke şehîd kenê cenazayanê înan zî nêdanê. Xora no têna rîyê înan o raştî ramojneno. Ez veng dana PDKyî ke wa dişmenî reyde têmegêro, agêro xeta welatperwerîye ser. Venga şarê kurdî zî dana. Êyê ke 30 serrî Kurdîstanî rê xayînîye kenê, wextê ci yo ke înan ra hesab bêro persayene. Xayînî do rojêke hesab bidê.''