Hemserekê Komeleya Heqanê Merdiman a Kantonê Firatî Ehmed Dawûdî û Endama Îdareyê Heyva Sore Sozdare Elî derheqê hêrişanê dewleta tirke û netîceyanê nînan de ajansê ma rê qisey kerd.

Ehmed Dawûdî dîyar kerd ke dewleta tirke bi giranî hêrişê Awbendê Tişrînî, Pirdê Qereqozaxî û Kobanê kena û şar nê hêrişan ra bê awe û ceyranî mendo. Dawûdî vat: ‘’Dewleta tirke kena ke şarî ser o tersî biaferna. Tîmanê ma cayanê hêrişan ra delîlî arê dayê. Ma pêro sûcê şerî kerdî belge û 8ê kanûne de pêşkêşê Komîsyonê Cigêrayîşî yê NYyî kerd.

Dewleta tirke bi nê hêrişanê xo P;eymana Cenevre binpay kena. Dewleta tirke îstasyonê awe, ambulansan, binawanîye û bînayanê xizmetî kena hedef. Vera nê sûcanê şerî ganî rêxistin û dezgehê mîyanneteweyîyî bêveng nêmanê.’’

Sozdare Elî ard ziwan ke Heyva Sore ya Kurdîstanî dezgehêkê hetkarîye yo la tim dewleta tirke aye kena hedef. Sozdare vat: ‘’Ambulansê ma seba mudaxeleyê hêrişan tim waran de yê. La dewleta tirke qestî ra nînan kena hedef. Ancî ambulansê Îdareyê Xoserî zî hetê dewleta tirke ra yenê hedefkerdene. Heta nika nê hêrişan de 2 ambulansê ma destî ra şîyî, 3 embazê kedkarê weşîye şehîd bîyî û 3 kedkarê weşîye zî birîndar bîyî. Ganî çew vera nê sûcanê dewleta tirke bêveng nêmano. Ganî hêrişê dewleta tirke cade bêrê vindarnayene.’’