Hemserekê Komîteya Karanê Komelkî û Xebate ya Îdareyê Rojawanî yê Sûrîye Hemdan El Abîdî hêriş û polîtîkayê dewleta tirke yê vera herême ANFyî rê ercnayî.

Hemdan El Abîdî ard ziwan ke tek armancê dewleta tirke îşxalê herêm o û vat: ''Her kes zaneno ke Tirkîya wazena xeyalanê dewleta Osmanîyan bîyaro ca. Tirkîya pê nameyê Îslamî xîret kena ke îşxalê xo meşrû bikera. La sey Osmanîyan qirkerdiş, talan û dizdîye ra ber çîyêk zî nêkena. Dewleta tirke bi bahaneya asayîş û pawitişî wazena Musilî ra heta Helebî erdê Sûrîye û Iraqî îşxal bikera. Coka paştî dana El Nûsra û DAÎŞî. Dewleta tirke nika Îdlîb de cergan ra artêke awan kena û bi nê cergan hêrişê têgêrayîşê azadîye yê kurdan kena. Têgêrayîşê azadîye heqê xo yê meşrûyî ano ca û erdê xo paweno. Dewletê Iraq û Sûrîye ganî rayîr nêdê îşxal û mudaxeleyanê dewleta tirke.

Ez venga şaranê tirkmen, çerkes, ereb, armenî û asûrîyan dana ke ma pêro hedefê hêrişan de yê, têna kurdî nê. Nika Erdogan vano ke ê do mîlyonêkê sûrîyeyîjan do bişawê. Ê hê Efrîn, Girê Sipî û Serêkanîyê de kampan awan kenê. Bi taybetî dezgehê merdimî yê Sûudî û Quweytî paştî danê viraştişê nê kampan. Ez venga Sûudî û Quweytî dana ke nê projeyî ra fek vera bidê. Çunke merdimê ke do tîya de bêrê cakerdene, tîya ra nîyê. Dewleta tirke wayîrê nê erdî nê xerîbê nê erdî do tîya de cabikera. Wayîrê na herre  est ê. No destsernayîş, talan, vurnayîşê demografî û sûcê vera merdimîye yo.''