Çeteyanê DAÎŞî 20ê çeleyê 2022yî de pê paştdayîşê îstîxbaratê tirkî vera bajarê Hesekê yê Rojawanî hêriş kerd. Pê hêrişî ame waştene ke çeteyî zîndanî ra bêrê vetene û bajar bêro îşxalkerdene.  QSD-YPG-YPJ, Hêzê Asayîşî yê Zereyî û şarê herême nê planî pûç vetî.

ANF resa îtîrafanê Reşîdî ke berpirsîyaranê çeteyanê DAÎŞî ra yew o. Çete Muhammed Abd Avado ke 1987 de Til Temir de ameyo dinya (Reşîd) 2013 de tewrê çeteyan bîyo. Goreyê xeberanê ke ma Hêzanê Asayîşî yê Zereyî ra girewtî Raşîd tewrê xeylêk hêrişan bîyo. Raşîdo ke berpirsîyarê hêrişê Qamişloyî yê 2016î yo ke 62 kesî şehîd bîbî hetê DAÎŞî ra sey walîyê Hesekê û Serêkanîê amebi tayînkerdene.

Reşîdî îtîrafanê xo de nê vatî: ''Planê hêrişî nîsana 2021î  de kewt dewre. Hêriş mi xo herême de amade kerdêne. Wezîfe hêrişê vera zîndanî dîya mi. O wext ez Reqa de bi ya. Talîmatê hêrişî ma Nasir Dînallahî ra girewt.  Nasir îdarekarê Dîwanê Asayîşî yo. Waranê ke binê kontrolê dewlete tirke û çeteyanê ci de yê uca maneno. Tekîlîya mi bi zîndanî verî Nasirî na ro. Des rojî verê hêrişî mi bi xo zîndanî reyde tekîlîye na ro.

Goreyê planî ganî teberê hêrişkaranê ke xoser bomba teqnenê ganî hêriş do pê 30 kesan biamêyene kerdene. Semedê hêrişî wesayîtê bombaberkerdeyî amebî amadekerdene. Yew wesayît kuçeyê Panorama de o bînî zî verê berê zîndanî de do biamêyene teqnayene.  Hêrişê do şewe biamêyene kerdene. Di wesayîtî zî semedê cepilxaneyî amede bî. Di kesan herême ra xebere dayêne. Ganî hêirş menga teşrîna verêne de biamêyene kerdene la rîyê asayîşê herême û korona ra nêbi û  ame peydeeştene. Tirkîya ra tay kesan hucreyê DAÎŞî yê ke Rojawan de yê fînanse kerdêne. Tekîlîya nînan dezgehanê asayîşî yê Tirkîya reyde bibî. Kesê payeberzî yê asayîşî bi xo hem no hêriş hem zî falîyetanê DAÎŞî yê herême fînan se kenê.''