Dewleta tirke ya îşxalkere 20ê çeleyê 2018î de pê pêro çekanê xo yê giranan û 72 teyarayanê şerî hêrişê Efrînî kerdbi. Efrînijan vera ney Xovrdayîşê Serdemî dabi destpêkerdene. Xoverdayîş 58 rojan dewam kerd û şarê Efrînî hetê şerwananê YPG û YPJyî de ca girewt.

Gazîyanê Xoverdayîşê Serdemî ra Şervan Efrîn û Nîzar Efrînî ANFyî rê qala helanê Xoverdayîşê Serdemî kerde.

Şervan Efrîno ke qezaya Mabata ya Efrînî ra yo, dewa Qude ya qezaya Racoyî de tewrê şerî bi. Şervan Efrînî vat: ''Dişmenî waşt erdê ma îşxal bikero. Ma vera dişmenî xo ver da. Ma şarê xo ra hêz û moral girewt. 18ê sibata 2018î de wextê xoverdayîşî de BKC teqa û ez çimê xo ra birîndar bîya. Ez derbazê herêma Cizîre bîya. Dima ez agêraya. Gazitîye qetî verê mi de nêbîye asteng. Ez nika xoverdayîşê xo rê dewam kena.''

Nîzar Efrîn zî qezaya Cindirêsî de birîndar bîyo. Nîzarî vat: ''Wexto ke ma dî dewleta tirke wazena erdê ma îşxal bikera ma bêveng nêmendî û tewrê çeperanê şerî bi.  Efrîn ma rê fîraz o. Ez dewa Yalanqozî de birîndar bîya, 6 embazê mi zî şehîd bîyî. Çimêkê mi destî ra şîye. Se beno wa bibo ma do erdê xo war meverdê û xoverdayîşê xo rê dewam bikerê.''