Şaro ke waranê binê îşxalê dewleta tirke de ciwîyayêne şertanê giranan ra şinê waranê Îdareyê Xoserî. Başûrê Girê Sipî de dewê ke dewleta tirke îşxal kerdê, tede di serrî yo zulm est o.

Dewleta tirke 2017 de hêrişê waranê Îdareyê Xoser kerd û verî Cerablus, Bab û Heleh hetê cergan ra ameyî îşxalkerdene. Dewleta tirke zî 2019 de Girê Sipî û Serêkanîyê îşxal kerdî. 

Çar keyeyê bi 24 kesan vizêr serê sibayî xêrê xebata Hêzanê Asayîşî û Meclîsê Leşkerî yê Girê Sipî ra ameyî warê Eyn Îsayî. Şar hetê QSDyî ra ame pêşwazîkerdene û teslîmê Meclîsê Şarî yê Eyn Îsayî ame kerdene.

Casim El Mihemedî dîyar kerd ''Ma uca de têna vaş werdêne. Ma tersayêne ke wexto ke yenê tîya beno ke çîyêk bêro sereyê ma. Kesê ke hetkarîya ma kerd, ma înan rê sipas kenê. Tîya aram bi. Uca de ma zîndan de bîyî. Ewro berê zîndanî abîyî û ma azad bîyî.''

Şehe El Ubêtî vat: ''Ma vêşanîye ra remayî. Ne mazot ne zî genim est bi. Dewe de ma seke zîndan de bîyî. Pêro werdê ma qedîyabî. Hînî vêşanîye rê tehamulê ma nêmendbi. Ma neçare mendî ke biremê. Seba ke ma resayî tîya zaf şa yê.''

Endamê Meclîsê Sivîlan ê Eyn Îsayî Şîrî Ebîdî vat: ''Ê îşxalê dewleta tirke ra remayî. Meclîsî   çi hewce yo hetkarîya kerde. Xeylêk kesî wazenê biremê bêrê tîya ma zî goreyê îmkananê xo şarê xo tîya ra vejê.''

Endamê Meclîsê Leşkerî yê Girê Sipî Osman Şahînî vat: ''Ma vera zulmê dewleta tirke xo ver dayêne, mîyanê şert û mercanê giranan de ciwîyayêne. Ma zaf kêfweş ê ke ameyî tîya. Xîretê ma tîya de do dewam bikerê.''