Hetkarê Hemserekanê Meclîsê Rayberdişî yê Îdareyê Xoserî Hesen Koçerî derheqê ambargoyê vera taxanê Eşrefîyê û Şêx Meqsûdî de ANFyî rê qisey kerd. 

Koçerî îfade kerd ke Rojawan wextêkî ra nata binê ablûqaya dewleta tirke, PDK û rejîmê Şamî de yo û vat: ''Rejîmê Şamî herêmanê kurdan ê Helebî rê ambargo keno. Armancê nê ambargooyî no yo ke pê vêşanîye îradeyê şarî teslîm bigêro. Rejîmê Şamî çend reyî no sîyaset ardbi ca. Rejîm kurdan sey hemwelatîyanê xo nêhesibneno. No sîyaset raşt nîyo û sîyaset şarê Sûrîye bero ver bi parçebîyayîşî. Rejîmê Şamî qetî sîyasetê demokratîkî yê Îdareyê Xoserî qebul nêkeno û sîyasetêkê şovenîstî keno. Eke na rewşe wina dewam bikera, tehlukeyê pîlî do biqewimîyê.

Sûrîye de cara tay herêmî destê dewleta tirke de yê. Eke rejîm nê sîyasetî rê dewam bikero hîna zaf herêmî do bikewê destê dewleta tirke. Rejîm tim Îdareyê Xoserî pê 'parçekerdişê Sûrîye' sûcdar keno. La rejîm bi xo sûrîye parçe keno. Mîsal herêmanê îşxalkerdeyan de pereyê tirkan (lîraya tirkan) û alaya tirkan şuxilîyenê. Sûrîye hînî anêgêra verê prosesê 2011î. Ganî rejîm goreyê ney têbigêro. Rejîm ya yewîya Sûrîye bîyaro ca yan zî do Sûrîye parçe biba. Eke ambargo dewam bikero nê 500 hezar merdimê Helebî do sere wedarnê.''

Koçerî da zanayene ke vera ambargoyî hêzanê Qamişloyî dezgehê  hukmatê Şamî girewtî binê ablûqa û eke rejîm ambargoyî nêwedarno netîceyê hînî xirabî do vejîyê meydan. 

Koçerî vist vîrî ke rejîmê Şamî heta nika vera pêro hêrişanê Tirkîya bêveng mendo û vat: ''No sîyasetê bêvengîye do Sûrîye rê netîceyanê xiraban bîyaro. Ambargo do qetî şarê Sûrîye rê fayde nêkero û heta Sûrîye parçe bikero. Ganî rejîmê Şamî fam bikero ke no sîyaseto kahan sey verî netîceyan nêdo. Şarê Şêxmeqsûdî vera rejîmê Şamî hêrsbîyaye yo. Sûrîye ya do parçe biba yan zî do demokratîk biba. Sûrîye ganî yew merkezî ra nêro îdarekerdene. Ganî şarê Sûrîye bibê yew û herêmanê îşxalkerdeyan bixelisnê.''