Hemsereka TEV-DEMî Rûkene Ehmed derheqê têkoşînê vera tecrîdê Îmraliyî, amadekarîya hêrişanê neweyan, propagandayanê PDK-ENKSî û girîngîya yewîya neteweyîye de ANFyî rê qisey kerd.

Qiseykerdişê Rûkene Ehmed ra beşêk wina yo:

''Rayber Apoyî 24 serrî yo binê tecrîdêkê giranî de yo. Dewletê mîyanneteweyî, CPT û Konseya Ewropa vera nê tecrîdî mesuldarîya xo nêanê ca. Ma zî sey TEV-DEMî tewrê Hemleya Wextê Azadîye bîyî. Komîteya ma ya Heqanê Merdiman derheqê tecrîdî de eşkerayîyî dayî, semînerî dayî. CPT ganî cewab bido eşkerayîyan û erkê xo bikero. Vera tecrîdî çalakîyê ma dewam kenê. Ganî ma nê çalakîyan xurtêr bikerê. Armancê Newroza emserîne caardişê Azadîya Rayber Apoyî bi. Seba nê armancî ma çalakîyanê xo rê dewam kenê.

Dewleta tirke cara hêrişê xo qetî nêvindarnayî. Dewleta tirke nika wazena şerê Rûsya-Ukrayna bivurna firsendî û xo seba hêrişan amade kena. Ma zî tay agahîyî girewtî ke dewleta tirke vera Rojawanî amadekarîya hêrişan kena. 

Dewleta tirke Rojawan de bi taybetî vera sivîlan hêriş kena ke îstîkrarê herême bixeripna. Vera nê hêrişan komel de amadekarîyî est ê, ma şarî hişyar kenê. Eke komel xo rêxistin bikero û pê hêzê xopawitişî bawer bikero eşkeno hêrişan pûç bikero. Na babete de zî xebatê ma est ê. 

Hêzê ENKSî çin o ke Rojawan de şarî rê tesîr bikero. ENKS waştişê dişmenê kurdan ser o mîyanê şarî de propaganda keno, wazeno şar bêîrade bikero. Hemkarîya PDK-ENKSî ya bi dewleta tirke hînî eşkera ya. Wa şarê ma zî naye bizano. ENKS Efrîn de propaganda keno, vano 'abigêrê Efrînî.' Komel hînî pê ENKSî bawer nêkeno. Eke şarê ma xo rêxistin bikero na propagandaya ENKS û PDKyî do bêra pûçkerdene.

Dewleta tirke hêrişê Şingal, Herêmanê Pawitişî yê Medya, Rojawan yan zî hêrişê kamcayê Kurdîstanî bikera ma do vera ney bigêrê. Sere de şarê Başûrî ganî pêro kurdî vera nê hêrişan vinderê. Ganî ma Rojawan de Kongreya Neteweyîye awan bikerê. Na kongre do yewîya şaranê Rojhelatê Mîyanênî awan bikera. Eke na kongre bêra awankerdene ma eşkenê konseptê hêrişanê dewleta tirke pûç bikerê û hemkarîya PDK-dewleta tirke birijnê. Ruho neteweyî yo ke bi kedanê pîlan virazîyayo, do hêrişanê dewleta tirke û propagandayanê PDK-ENKSî birijno.

PDK bi destê dewleta tirke Herêmanê Pawitişî yê Medya de hêrişê gerîlayan keno. Eke PDK îşxalkeran rê hemkarîye keno o çax nêeşkeno qala kurdayetîye bikero. Ez venga cinîyan û şarê Başûrê Kurdîstanî dana ke şerî vindarnê û yewîya xo awan bikerê. Seba ke destkewteyanê xo bipawê ganî ma wayîrê nê tewirî vejîyê.

Şarê Rojawanî bingeyê Şerê Şarî yê Şorişgêrî de xo rêxistin keno. Hema tay kêmasîyê ma est ê. Wextê hêrişanê vera Zîndanê Hesekê de zî şerê şarî yo şorişgêr amebi kerdene. Eke şerwananê şarî dormeyê zîndanî nêgirewtêne Hesekê ameyêne îşxalkerdene. Şarê Hesekê rixmê nê hêrişan zî erdê xo nêterikna. Seba ke ma vera hêrişanê topyekûnan bigêrê ganî şarê xo bi hawayêkê topyekûnî amade bikerê.''