Dadîya di gerîlayan Sultane Îbrahîm (75) serranê 90an de têkoşînê azadîye şinasnena. Lajê aye Îbrahîm (Memo Îbrahîm) 1992 de tewrê gerîlayan beno û 1995 de Botan de şehîd beno. Lajê aye yo bîn hema zî gerîla yo. Sultane Îbrahîm wextêk Lubnan de Rayberê Şarê Kurdî Abdullah Ocalan zî dî. 

Dayîke Sultane ANFyî rê qala tewrbîyayîşê xo yê têkoşînê azadîye kerd.

Dayîke Sultane vat: ''Mi destpêk de nameyê Apogîrna yan zî ê PKKyî nêzanayêne. Ma vatêne 'talebeyî.' Dima ke embazê cinîyî ameyî keyeyê ma, ma embazî şinasnayî. Reya verêne embaze Salîha ameye keyeyê ma. O çax ma rejîmê Baasî ra tersayêne coka mi nêwaşt ke embaze Salîha de qisey bikera. Embazî o çax yew keye de mendêne û xizan bîyî. Mêrdeyê mi bi nimiteyî înan rê şeker, çay û werd berdêne. Embazî kesê pak û hurmetdar bîyî. Dima têkoşînê embaze Salîha û embazanê bînan zaf tesîrê mi kerd. Ez taxanê Hîlko û Kornîşî yê Qamişloyî de tewra karan bîya. Ma keye bi keyeyî gêrayêne û şarî rê qala têkoşînî kerdêne. 

Wextêk mi firsend dî ke şora Lubnan û Şam û uca de Rayber Apo bişinasa. Rayber Apoyî nê pêvînayîşan de bi dergî qisey kerdêne. Ey raştîya dişmenî û şarî kerdêne. Rayber Apoyî vatêne ke ganî her hela ma bi têkoşînî derbaz biba. Rayber Apoyî bi taybetî cinîyan ser o ercnayîşê hîrayî kerdêne. Rayber Apoyî şarê ma hişyar kerd û dişmen ma rê da şinasnayene. Dima ke mi Rayber Apo dî hînî ez bi coşêkê pîlî tewra karî bîya. Mi soz da ke do sey verî nêbo. Mi keyeyê xo kerd kampe, keyeyê embazan.

Pêvînayîşê Rayber Apoyî ra dima ma fam kerd ke ganî senî biciwîyê, têkoşîn çita yo û ma do se bikerê. Hînî ma rejîmê Baasî ra zî nêtersayêne. Rayber Apoyî zaf kede daye Rojawanî. Keda ey xoverdayîş û xoverdayîşê ma zêdîna. Eke ewro ma payan ser de no xêrê Rayber Apoyî ra yo.''