Hetkarê Hemserekanê Meclîsê Girê Sipî Fezea Mihemedî ANFyî rê qisey kerd û hêrişê dewleta tirke yê vera Herêmanê Pawitişî yê Medya şermezar kerdî.

Fezea Mihemedî ard ziwan ke dewleta tirke Rojawan de paştî dana cerganê DAÎŞî û erdê Rojawanî îşxal kena. Mihemmedî vat: ''Dewleta tirke sey vizêrî ewro zî vera Îdareyê Xoserî komployan kena. Ma xora xoverdayîşê xo rê dewam kenê. Dewleta tirke hem erdê Rojawanî îşxal kena hem zî paştî dana cergan. Ganî nê kerdişan ra ci rê ambargo bêro kerdene. Dewleta tirke verê çareserîya meseleya Sûrîye de astengêk a. A cergan perwerde kena û şawena Lîbya, Azerbeycan, Iraqî. Hînî wextê ci ameyo ke dewleta tirke rê vajîyo 'bes o.' ''

Mihemmedî vist vîrî ke artêşa Iraqî sey wextê hêrişanê DAÎŞî yê vera Şingalî remena la gerîlayî herême pawenê. Mihemmedî vat: ''Dewleta tirke dekewena erdê Iraqî la Iraq vera ney bêveng o. Hêrişê vera gerîlayan yeno manaya hêrişê vera ma. Çunke gerîlayan ma pawitbî. Artêşa tirke wazena Iraqî zî sey Sûrîye îşxal bikera. Ez venga Yewîya Ereban dana ke wa vera îşxalê dewleta tirke vengê xo veja, Iraq û Sûrîye mevisna destê dewleta tirke.''