Endamanê Yewîya Cinîyan a Zenoba ya Minbicî û Meclîsê Minbicî ANFyî rê qisey kerd û vera hêrişanê îşxalî yê dewleta tirke tewirê xo mojna.

Endama Yewîya Cinîyan a Zenoba Nedîne Şeyh Mihemed vat: ''Dewleta tirke pêro şaranê herême hedef kena. Ma vera nê hêrişan pîya xo ver danê. Dewlete tirke do nêeşka îradeyê ma bişikna. Ma do vera hêrişanê dewleta tirke û hemkaranê ci heta peynî têkoşîn bikerê.''

Endama Meclîsê Cinîyan ê Sûrîye Heyate Saîm vat: ''Dewleta tirke wazena aramîya herême bixeripna û pêro herême îşxal bikera. Ma sey cinîyanê Rojawanî vera ney do bêveng nêmanê. Ma do erdê xo teslîmê Tirkîya mekerê.'' 

Mihemed Kabartayiyê çerkesî vat: ''Dewleta tirke seba ke projeyê Neteweya Demokratîke bixeniqna pêro şaran kena hedef. Ma do heta peynî vera nê hêrişan vinderê. Ma venga pêro rêxistinanê mîyanneteweyîyan danê ke vera nê hêrişan tewirê xo bimojnê. Ganî ma dormeyê Îdareyê Xoserî de bêrê yewca.''

Endama Yewîya Cinîyan a Zenoba Debea Beko zî ard ziwan ke ê sey şaranê herême yew bibê û vera hêrişan vinderê.

Cuma Heyderê tirkmenî zî vat: ''Îdareyo Xoserî destpêkî ra nata seba pêro şaran têkoşîn keno. La destpêkê şorişî ra nata dewleta tirke hêrişê destkewteyanê ma kena. Ma sey şarê tirkmenî vera nê hêrişan heta peynî xo ver bidê.''

Endama Yewîya Cinîyan a Zenoba Asya Îsmaîl Hisên vat: ''Rejîmê Şamî vera hêrişanê dewleta tirke bêveng o. Eke rejîmê Şamî mesuldarîya xo bîyardêne ca Amerîka û Rûsya tîya de nêgêrayêne. PDK zî sey rejîmê Şamî têgêreno.''