Şaristanê Qamişloyî yê Rojawanî de peykerê şehîd Yusuf Guloyo ke hêrişê dewleta tirke ya îşxalkere de şehîd bibi, bi merasîmêkî ronîya.

Fermandarîya QSD, YPG û YPJyî, Şaredarîya Qamişloyî, xeylêk dezgeh û rêxistinî û hemwelatîyî tewrê merasîmî bîyî. Serê peykerî de wina ame nuştene: ''Seba Kurdîstanê azadî û şarê kurdî ez zî şehîd bena û panc lajê mi zî bibê wa şehîd bibê, ez do înan bikerê qurbanê Kurdîstanî.''

Perkersazê peykerê Guloyî Emîn Ebdoyî merasîm de qisey kerd û vat: ''Hertim tîlîlîyê ey do çimê dişmenî de bibê, o bi peykerê xo cewab bidê dişmenî.'' Fermandarê Pêroyî yê YPGyî Nûrî Mehmudî zî ard ziwan ke Yusuf Gulo sembolê welatperwerîye yo.

Birayê Guloyî Îbrahîm Guloyî zî qiseykerdişê xo de xoverdayîşê gerîlayan ê vera hêrişanê dewleta tirke selam kerd û vat: ''Ma heta gerîlayanê azadîye de yê.''

Merasîm bi goşdarîkerdişê vengê şehîd Guloyî qedîya.