Înîsîyatîfê Şarî yê Qamişloyî pîya bi heme dezgeh û sazgehanê Îdareyê Xoserîya Demokratîke yê Rojawanî û bi seyan kesan vera hêrişê îşxalî yê dewleta tirke rayraşîyayîşêk organîze kerd.

Rayraşîyayîşo ke Çatrayîrê Sonî de dîya destpêkerdene heta Çatrayîrê Şehîd Rûbar Qamişloyî dewam kerd.

Rayraşîyayîş de bi kurdkî û erebkî sloganê xoverdayîşî ameyî vatene, xoverdayîşê gerîlayan ame selamkerdene û îşxal û îxanet ameyî protestokerdene.  Badê rayraşîyayîşî semedê şehîdan rêz ame girewtene û tîya bi nameyê înîsîyatîfî Mahsûm Hesenî qisey kerd.

Hesenî xoverdayîşê gerîlayan selam kerd û vat: ''Dişmenê kurdan çend faşîst bo zî, şarê kurdî do xover bido mergî ra cuye biafirno. Ma veng danê şarê xo yê Başûrî ke wa vera PDKyî yo ke dewleta tirke reyde hemkarîye keno, tewir bîgêro. Ganî hukmat û şarê Iraqî zî destûr medê ke dewleta tirke şarê kurd û erebî biverdo pê û vera nê plananê leyminan bivejîyê.''