Wezîrîya Pawitişî ya Tirkîya îdîa kerdbî ke QSD mesuldarê hêrişê vera Karkamişî yo. Merkezê Îrtîbatî û Çapemenîye yê QSDyî derheqê îdîayanê wezîrîye de eşkerayîyêke daye û nê pare kerdî:

''Goreyê xeberanê ke hetê Wezîrîya Pawitişî ya Tirkîya ra ameyê vilakerdene, hêzanê ma bi hawanî hêrişê qezaya Karkamişî kerdo. Yew eleqeyê ma bi nê hêrişî çin o. Artêşa tirke ya îşxalkere nê îdîayan xo rê kena bingeyê hêrişanê Rojawanî. Nê hêrişanê îşxalî de dewê Kobanê, Eyn Îsa, Minbic û Şehba yenê hedefkerdene û heta nika tewr tay 29 dewî dîyayî bombayan ver.

Serebûtê Karkamişî zî seba meşrûkerdişê hêrişanê xo hetê artêşa tirke ra ameyo serûberkerdene. No serebût provakasyonêk o. Ganî şarê ma û rayaumûmîya dinya pê nê xeberanê xûran bawer mekerê.''