Hema zî vîrê roniştoxanê Kobanê de vîrameyîşî est ê ke înan Rayber Apo dîbî. 

Xalib Elûşî qala ê rojan kerde û vat: ''Wexto ke Rayber Apo derbazê Rojawanî bi, verî şi keyeyê Omer Elûşî û dima şi Şam. Uca ra zî derbazê Lubnanî bi û kampa perwerdeyî awan kerde. Fikranê Rayber Apoyî ser de PKK bi pîl. Şar dormeyê Rayber Apoyî de bi yew. Rayber Apoyî têna seba kurdan nê seba pêro merdimîye têkoşîn kerd. Bîyayîşê Rayberê Şarê Kurdî Abdullah Ocalanî kurdan rê bîyayîşêko newe bi. 

Rayber Apo fîlozofêk o. Ey vatêne 'Sovyetî do birijîyê.' Selahîyetdarê armenî Hene Îbrahîmî Rayberîye rê vat 'Qey ti Homa yî?' Rayber Apoyî vat 'Ez Homa nîyan, ez cigêrayîşan kena.' Çîyo ke Rayber Apoyî vat qewimîya. Ey vatêne 'Rojawan do azad bibo.' Nika ma hê erdê xo de bi azadî ciwîyenê. 4ê Nîsane seba merdimîye zaf girîng o û roja azadîya şaran a.'' 

Ehmed Hecî Reşoyo ke Rayberê Şarê Kurdî Abdullah Ocalan dîyo vat: ''Wexto ke ma PKK şinasna, ma xo zî şinasna. Şinasnayîşê PKKyî xobîyayîşê ma bi. Wexto ke Rayber Apo amebi Sûrîye xeylêk şerwanî zî derbazê Rojawanî bîyî. Wexto ke ma Rayberîye goşdarî kerdêne pêro canê ma bîyêne rehet. Xêrê Rayber Apoyî ra ma xo şinasna. 

Rayber Apo yew fermandar, doktor û leşker bi. Ey xo çewî ra cîya nêdîyêne. Birînê ke îqtîdaran mezgê ma de viraştbî Rayber Apoyî derman kerdî. Ney zî îmkan da ke bi rayîrê şorişî şar eyd û bendê xo bişikno. Rayber Apo têna seba kurdan nê seba pêro şaranê bindestan û mazlûman werişt we.''