Rojawanê Kurdîstanî de  şar serrgêra îşxalê dewleta tirke yê Efrînî de vejîya meydanan û mesajê xurtkerdişê têkişînî dayî.

Qamişlo

Qamişlo de bi hezaran kesê ke vejîyayî kuçeyan bi pankart û sloganan hêrişê dewleta tirke yê vera Rojawanî şermezar kerd û vat ê do rixmê heme hêrişan  peyser game nêerzê û xoverdayîş xurt bikerê. Qiseykerdişan de ame vatene ke bi ruhê xoverdayîşî do Efrîn, Serêkanîyê û Girê Sipî reyna berê azadkerdene.

Girkê Legê / Çilaxa

Qezayanê Girkê Legê û Çilaxa de zî bi heman waştişî şar kuçeyan de bi. Çalakîye de ame vatene ke ê do  bi xoverdayîşî îşxalkeran erdê xo ra vejî û bajaranê xo yê ke ameyî îşxlakerdene reyna azad bikerê.

Dêrik

Dêrik de zî temsîlkarê dezgehanê sîyasîyan zî tede bi hezaran kesî vera hêrişê îşxalî yê dewleta tirke meydanan û bi slogananê xoverdayîşî qîrayî. Qiseykerdişan de ame vatene ke ê do xoverdayîş gird bikerê û Efrîn, Serêkanîyê û Girê Sipî destê îşxalkeran ra bixelisnê.

Til Koçer

Til Koçer de zî meydanan de vengê xoverdayîşî berz bi. Şaro ke fotografê şehîdanê xo û pankertê ke sero mesajê girdkerdişê xoverdayîşî estî kiriştî bi sloganan vera îşxalkeran hêrsê xo ard ziwan û vat ma do bi xoverdayîşî ser bikewê.

Til Hemîs

Til Hemîs zî rayraşîyayîş û mîtîngêk ameyî viraştene. Qiseykerdişan de bale ameye ante serê xoverdayîşê 58 rojan ê Efrînî ser û ame vatene ke şarê Efrînî semedê pawitişê erdê xo vera îşxalkeran xoverdayîşêko bêhempa da û no xerdayîş do peynî ra tewr peynî ser bikewo.

Amûde

Amûde de zî hêrişê dewleta tirk a îşxalkere bi çalakîyêke ameyî şermezarkerdene. Çalakîye de ame vîrardene ke dewleta tirke senî Rojawan de domanî qetil kerdî  û ame vatene ke ê do bi xoverdayîş vernîya qirkerdişanê  îşxalkeran bigerê. Reyna hêzanê mîyanneteweyî ra zî ame waştenê ke vera nê hêrîşan bêveng memanê.

Tirbesipîye

Tirbesipîyê de zî şar vera hêrişê îşxalî yê vera Efrînî kuçeyan de bi. Çalakîye pankertê ke sero dewleta tirke hêrişakare, dizde û talanker  nuşte bî ameyî kiriştene. Qiseykerdişan de ame waştene ke wa cade îşxal bêro qedînayene û dewleta tirke bêro hukmkerdene.

Til Berak

Til Berak de zî bi seyan kesî bi pankertê bi ruhê şehîdanê Şengalî ma do Efrîn, Serêkanîyê û Girê Sipî azad bikerê rayra şîyî. Çalakwananê ke posterê Rayberê Şarê Kurdî Abdullah Ocalanî  kiriştî bi sloganan vera îşxalî qîrayî û vat ma do erdê xo dişmenî rê meverdê.

Hesekê

Hesekê de zî şar vera îşxalî dewleta tirke yê vera Rojawanî payra bi. çalakîye de fotografê domananê ke dewleta tirke  Til Rifat de qetil kerdî  û sîmgeyê haştîye gileyê zeytînî ameyî kiriştene. Qiseykerdişan de ame vatene ke Erdogan verê çimenê heme dinya şaro sivîl qetil kerd, erdê înan talan kerd  la bêvengîya dinya dewam kena. Ma do verê nê hêrişan de bêveng memanê, xo ver bidê û ser bikewê.

Dirbesîyê

Dirbesîye de zî bi slogana ‘Ma do xoverdayîşî xurt bikerê, Efrîn, Serêkanîyê, û Girê Sipî azad bikerê‘ rayraşîyayîşêko kîtlekî ame viraştene. Qiseykerdişan de ame vatene ke heta ke îşxalkerî erdê ma ra vejê xoverdayîş do dewam bikero.

Şedadê

Şedadê zî bi wesîleya serrgêra îşxalê Efrînî dewleta tirk a îşxalkere ameye protestokerdene. Qiseykerdişan de xoverdayîşê QSDyî ame silamkerene û ame vatene ke xoverdayîş do serkewtişî bîyaro.

Til Temir

Til Temir de zî vera hêrişê îşxalî yê Tirkîya vengê xoverdayîşê şaran berz bi.  Çalakîye de ame vatene ke dewleta tirke wazena ke qesasê DAÎŞî bigîro la sey çeteyanê xo do ê zî vera xoverdayîşê şaran vîn bikerê.