Vera hêrişê îşxalî yê dewleta tirke û hemkarîya PDKyî her hetî ra nêrazîbîyayîşî zêdîyenê. Rojawanijan derheqê hêrişê îşxalî û xayînîya PDKyî ya vera kurdan de ANFyî rê qisey kerd.

Emîne Yasîna kobanêyije ard ziwan ke xayînîye PDKyî rê dana vînîkerdene û vat: ''Hinî keyeyê Barzanî rê bes o. Pîya bi îşxalkeran bîyî yew hêrişê kurdan û gerîlayan kenê. Bendê xayînîye kilm û qerfnaye yo, pê nê bendî çew nêeşkeno netîce bîgêro. 'nde semedê yewîye veng da veng nêşino înan. Peynîya xayînîye çîn a. Nê rayîrê xeletî ra peyser agêrê.''

Elî Îsayo kobanêyij zî vist vîrî ke PDK semedê menfeatê xo kurdan fîneno tehluke û vat: ''Gonîya înan de xayînîye est a. Dişmenî de embazîye kenê. Ê têna menfeatê xo dima yê, kurdî xeymê înan de nîyê.  No çîyo newe nîyo. Ê tim xayînîye kenê. Qicê ma pê destê înan yenê qetilkerdene.  Hetêkî ra xo rê servet kenê pêser hetê bînî ra mabênê Rojawan û Şingalî de dês nanê ro. No dêsê şermî yo.  Xo vîr a mekerê ke eke çîyêk gerîlayan bibo, şima zî kenê vînî. Xayînî tim bin kewnê.''

Azad Silêmano dêrikijî zî bale ante têkoşînê heqdarî yê gerîlayan ser û vat: ''Hêrişê dewleta tirke yê vera gerîlayan de engişta PDKyî zî est a.  PDK pê destê xo peynîya xo ano.Wa xo vîr a mekerê ke PKK çîn nêbeno. PKK heme Kurdîstanî temsîl keno. Coka hemê kurdî paştî danê PKKyî. Ma pêro kişta gerîlayan de yê. Vera çeteyan ma paştî danê gerîlayan. Gerîlayî semedê pawitişê şeref û anorê kurdan şer kenê. Çeteyî do bin bikewê PKK û gerîla ser bikewê.''

Fadîa Silêmanî ya qamişloyije zî vat: ''Ez dayîka şehîd û gerîla ya. Ez heta dalpaya peyên a gonîya xo pê paştîya gerîlayan de ya.  Dayîkê kurdan peyê qicanê xo yê ke vera îşxalî xover danê, de yê. Ma do çirey îşxal û xayînîya barzanîyan qebul mekerê.''

Îbrahîm Şêxmûso hesekêyijî zî vat: ''Dewleta tirke hêrişê gerîlayan kena. Şarê kurdî kişta gerîlayan de yo. PDKyî rê bawerîya ma nêmenda. Ê tarîxî ra xayînîye kenê û paştî danê dewleta tirke.  Bi seyan ciwanê ma pê destê ci ameyî qetilkerdene. Ma do heta hela peyêne tim paştî bidê gerîlayan.''

Nesra Habeşa efrînije zî ard ziwan ke ê do vera îşxalî pîya paştî bidê gerîlayan û vat gerîlayî semedê azadîye û xoserîya kurdan têkoşîn kenê, ma zî do vera hêrişan têkoşîn bikerê.

Îbrahîm Gencoyo efrînijî zî vat: ''Hêrişê vera gerîlayan pê destê PDKyî yeno kerdene. Ma nê qebul nêkenê. Ma zî semedê têkoşînî û şerî amade yê.''