Îdarekarê Dezgehê Keyeyanê Şehîdan ê Herêma Cizîre Huseyîn Ubeydo ke her hela Şorişê Rojawanî rê şahîdîye kerdbî, ANFyî rê qisey kerd.

Huseyîn Ubeydî pare kerd ke Şorişê Rojawanî bi keda şehîdan ameyo awankerdene û vat: ''Şorişê 19ê Temmuze bi qerardarî û bawerî ame awankerdene. Şorişê 19ê Temmuze Kobanê ra vilayê Dêrik û herêmanê bînan bi. O çax hêrişê rejîmê Şamî est bîyî û nînan reyde hêrişanê dewleta tirke zî dest pêkerd. 

Prosesê awankerdişê şorişî de bi hezaran ciwanê ma şehîd bîyî. O çax Dêrik de bi hezaran ciwanî bi sloganê 'Ma seba azadîye amade yê, ma amade yê ke mesuldarîya xo bîyarê ca' tewrê şorişî bîyî. Embazê bi nameyê Bawer est bi ke gazî bibi. Ma ey rê vat ke wa o tewrê şerî nêbo, ey qebul nêkerd. Ey vatbi 'Ez deyndarê embazanê xo yê rojawanijan a. Ê koyan de hetê mi de şehîd bîyî, ganî ez deynê xo bida înan.' Teyna destêkê ey est bi û ey wina şer kerdêne. Şehadetê ey zaf tesîrê şarê Dêrikî kerd. Bi desan kesî bi tesîrê embaz Bawerî tewrê şerî bîyî.  Wexto ke 2013 de cergan hêrişê Dêrilî kerd hîrê rojan şer dewam kerd. O çax ciwananê enternasyonelan zî ma reyde şer kerd. 

Ewro dişmen her hetî ra ma gêno binê ablûqa û hêrişê erdê ma keno. Dewleta tirke çend hêrişan bikera şar zî hendê xo ver dano. Şehîdê ma yê verênî Silava, Bêrîtane, Xebat û Bawer ewro bîyî bi hezaran kesî. Xoka dişmen do verê xoverdayîşê ma de bin bikewo. A raşte hêrişê dewleta tirke bêçaretîya ci eşkera kenê. Heta peynî ruhê Şoreşê Rojawanî do biciwîyo, no şar do apey game nêerzo.''