Zarîne Ameda ke eslê xo de mûşij a, Amed de dadîya xo ra bîya û uca de bena pîl. Zarîne 2004 dew tewra gerîlayan bena û 2014 de zî pa embazanê xo tewra xoverdayîşê Kobanê bena. Zarîne roja 25. ya xoverdayîşê Kobanê de birîndar bena.

Zarîne ney ra dima nêeşkena qisey bikera, rayîr a şora û vîrê ci zî şino. Doktorî vanê ke ganî a nasanê xo bivîna ke vîrê ci bêro xo ser. Keyeyê ci yeno, alayê YPG û YPJyî yenê mojnayene la Zarîne refleks nêdana înan. Peynî de fotografê Rayberê Şarê Kurdî Abdullah Ocalanî yenê mojnayene ci. A hele Zarîne qîrena û cuya ci ya newîye dest pêkena.

Zarîne Gabar de ya

Sorxwîne Mako 2012 de Koma Şehîde Berçeme de Zarîne şinasnaye û Botanî ra heta Gabarî koma Zarîne rê kuryetîye kerde. Sorxwîne wina qala aye kena: ''A embazêka zerrîgerm bîye. Seke mi bi serran o a şinasnayêne. Rixmê ke lingê ci birîndar bibî zî a qet nêvinderte. Wexto le ma resayî noqtaya xo zî ma de eleqedar bîye.2014 de Kobanê de reyna ma yewbînî dîyî. Zarîne Kobanê de sey sekbane erk kerdêne.  Zarîne û koma aye cepheyê Kanîya Kurdan de bîye. Înan cade sekbanê DAÎŞî bêtesîr kerdî.  Ê atmosferê Kobanê de Zarîne bîya çimeyê ma yê moralî.

A roje serê sibayî DAÎŞî hêrişê ma kerd. Verî ma hêrişê înan şiknayî. La dima DAÎŞî bi teqwîyeyêka pîle hêrişê ma kerd. Ê hêrişan de Zarîne bîye hedefa înan. 29ê teşrîna peyêne de Zarîne birîndar bîye. 3 fîşekî kewtî bedenê ci. Birîndarîya Zarîne zaf tesîrê ma kerd. Çunke a sekbanêka ma ya serkewte bîye. A 3 mengan nêameye xo ser. Dima wexto ke ameye xo ser o embazan pêşnîyazê doktoran ser o keyeyê ci ard, alayê YPG-YPJyî mojnayî ci. La Zarîne refleks nêdayêne. Wexto ke embazan fotografê Rayberîye mojna ci qîraye û ameye xo ser. Oyo ke Zarîne pê ciwîyena perwerîya bi Rayber Apoyî ya.''

Newale Egîd Koçera ke Kobanê de Zarîne şinasnaye wina qala ci kerde: ''A şer de çêr, sekbanîye de xurt bîye. 9 mengan ma pîya tedawî bîyî. O çax aye moral dayêne mi. Seba ke bieşka qisey bikera zaf xîret kerdêne''

Mizgîne Îdrîsa ke 2016 de Hemleya Minbicî de felç bîya, 2017 de Zarîne şinasnaye. Mizgîne vat: ''Mi nameyê aye zaf eşnawitbi. Wexto ke Zarîne seba tedawî ameye Qamişlo mi a şinasnaye. cuya aye bi 24 saetan Rayberîye û şehîdan reyde derbaz bîyêne. Rixmo ke bi giranî birîndar bîye, xurt bîye. Hetê manewîyatî ra a tewra cuyêka xurtêre bîye. Mi no pê çimanê xo dî.''