Baroyê Semsûr, Agirî, Êlih, Çewlîg, Bedlîs, Dêrsim, Amed, Colemêrg, Qers, Mêrdîn, Mûş, Sêrt, Riha,Şirnex û Wanî yê ke pê rojdemê çareserkerdişê problemanê komelkîyanameyî têhet netîcenameyê kombîyayîşî eşkera kerd.

Eşkerayîye de nê ameyî vatene: ''Seba ke meseleya kurdan nîna çareserkerdene û Tirkîya hetê demokrasîyî ra nêeşekena aver şiro.  Ma tecrubeyanê dejinan dî ke meseleya kurdan pê şîdetî nîna çareserkerdene. Na mesele têna çarçeweya hemwelatîya seyyewbînî de pê metodanê demokratîkan yena çareserkerdene.''

Baroyan vera dewaya qefilnayîşî ya vera HDPyî zî nêrazîbîyayîş mojna û vat ganî na xeletîye ra bêro agêrayene û na da dewa bêro wardayene.  Eşkerayîye de vera tepiştişê Şebneme Korur Fîncanci zî nêrazîbîyayîş ame mojnayene û ame waştene ke wa cade bêro veradayene.

Baroyan bedilnayîşê fermîyî sey qeyûmê neweyî yê rejîmî yê vera  momelî hesibnayî û vat na rewşe azadîyan gena binê zextî. Baroyan pîya bi qanûnê sansûrî, polîtîkaya bêcezayîye ya vera binpaykerdişanê heqan, bêtedbîrîya vera cînayetanê cinîyan  rê zî  nêrazîbîyayîş mojna  û bale ante serê şîdetê vera avûkatan.