Amed de 8ê hezîrane de 16 rojnamegerê kurdî ameybî destbendkerdene û 16ê hezîrane de ameybî tepiştene. La rixmo ke 3 mengî derbaz bîyî derheqê rojnamegeran de hema zî îdîanameyêk nêame amadekerdene. Rojnamegerê ke Zîndanê Amedî de tepişîyenê, pê 'endamîya rêxistine' yenê sûcdarkerdene.

Avûkata Sendîkaya Rojnamegeran a Tirkîya (TGS) rojnamegerî zîyaret kerdî û da zanayene ke rojnamegerî wazenê paştdayîşê seba înan bêro zêdînayene. Şahîne îfade kerd ke rojnamegerî zîndan de raştê binpaykerdişê heqan yenê û wina nê binpaykerdişî rêz kerdî:

''-Hewa ra koxûşan de hewa zaf germ o

-Dolaba cemedî nêdîyena koxûşê Azîz Oruç, Suat Doguhan û Abdurrahman Oncuyî.

-Aktîvîteyê sosyalî yenê astengkerdene

-Sewqê nêweşxaneyî nênê kerdene

-Rojnamegerê cinîyî yê tepişteyî berê banyoyî ra heta warê sosyalî pê kamerayan yenê teqîbkerdene û teberê zîndanî de çift kelemçe dîyena înan ro.

-Fîyatê kantînî vay ê

-Dest nîyeno mektuban ser

-Bedelê faturayan tepişteyan ra yeno girewtene û faturayî zêde yenê.

-Rojnameyê sey Yeni Yaşam, Evrense û Birgun nêdîyenê, têna kanalê ke îdare destûrê ci dano abenê.''