Rîyê vîrusê Korona ra DÎSK, KESK, TTB û TMMBOyî emser bire daye ke 1ê Gulane bi hawayêkê girseyî fîraz nêkerê herinda ci de verê Peykerê Taksîmî de şayîyêka sembolîke bikerê.

Şayîya Taksîmî ra verî polîsan dormeyê bînaya merkezî ya DÎSKî ya Beşîktaşî girewt.

Rixmê ablûqa zî Sereka Pêroyî ya DÎSKî Arzu Çerkezoglu û îdarekaranê sendîkayan pê çelengê 1ê Gulane bîna ra vejîyayî. Verê Arzu Çerkezoglu û îdarekaran hetê polîsan ra ame tepiştene. Polîsan nêverda ke sendîkayî ver bi Taksîmî şorê. La dima ke rixmê astengîyan zî sendîkayan dest pê rayraşîyayîşê xo kerd polîsan hêrişê înan kerd.

Çelengî hetê polîsan ra ameyî parçekerdene û Arzu Çerkezoglu zî tede zaf kesî ameyî destbendkerdene. Sekretero Pêroyî yê DÎSKî Adnan Serdaroglu, Serekê Dev-Yapi-Îş Ozgur Karabulut, Serekê Sendîkaya Werd-Karî Seyît Arslan, Serekê Sendîkaya Enerjî Suleyman Keskîn, Serekê Sendîkaya Weşîye Erdogan Demîr, Serekê Şubeyê Îstanbulî yê Sendîkaya Tekstîlî Asaletîn Aslan, Pisporê DÎSKî Faruk Işik, Pisporê Sosyal-Îşî Cemal Bîlgîn, îdarekarê Bîrleşîk-Metal Îş Muhammet Yurtsever, Sekretera Pêroyî ya Halkevlerî Ozge Ozan, endamê Halkevlerî Ersîn Kîrîş, Şêwirmendê TÎPî Bariş Atay, Polat Denîş  ameyî destbendkerdene.

Sereka Pêroyî ya DÎSKî Arzu Çerkezoglu û ê kesê bînî ameyî berdene bi asayîş.

Wekîlê HDPyî Musa Pîroglu, Wekîlê TÎPî Bariş Atay, Wekîlê CHPyî Turan Aydogan û Alî Şeker zî tede zaf kesî bînaya DÎSKî de yê.

Osmanbey de zî endamanê Yewîya Têkoşînî Gamze Nîhal Îyîdogan û Sena Şat pankarta bi nuşteyê ''Biciwîyo 1ê Gulane'' daliqnaye û dest pê rayraşîyayîşî kerd. Hetê bînî ra muxabîra Onsoz TVyî Ekîne Su Aktaş zî hêrişê polîsan de ameye desbendkerdene.

Kadikoy de 10 endamê Sendîkaya Karkeranê Înşaatî û Umu-Senî rixmê qedexeyî zî vejîyayî meydanan û înan waştişê xo yê seba 1ê Gulane ardî ziwan le netîceya hêrişê polîsan de ameyî destbendkerdene.