Îdîayanê peyênan ra dima cuye, weşîye û azadîya Rayberê Şarê Kurdî Abdullah Ocalanî newe ra bîyî rojdem. Dewleta tirke nêverdena ke Rayberê Şarê Kurdî heqanê xo bişuxilna, tira îstîfade bikero. Sîstemê tecrîd û îşkenceyî yê Îmraliyî nê serranê peyênan de bi çetinêr.

Nê îdîayan keye, avûkat û kurdî zî qerqilnayî. Dezgehanê demokratîkan, avûkatanê heqanê merdiman û sîyasetmedaran veng da ke wa cade Îmrali de pêvînayîş bêro kerdene. 27ê nîsana 2020î ra nata Abdullah Ocalanî ra xeberêke nêna girewtene. Avûkatan seba pêvînayîşî muracatê Serdozgerîya Komare ya Bursa kerd la înan rê cewab nêdîyeno. Serdozgerîye vizêr înternetî ser o pare kerd ke îdîayî raşt nîyê û rewşa Ocalanî hol a. La Avûkatê Buroyê Asrinî Îbrahîm Bîlmezî nê parekerdişî ser o vat: ''Çira ma seba ke rewşa weşîye ya muwekîla xo bizanê pabeyê serdozgerîye vindenê yan zî pê eşkerayîya ci bawer benê? Dewleta huqûqî de çîyo winasên çin o. Ma vizêr va sey ewro zî heman çi vanê. Ganî cade tecrîdê vera muwekîlê ma wedarîyo û tepişteyê Îmraliyî heqanê xo yê esasan wa bixebitnê. Ganî keye û avûkatî bieşkê pêvînayîşan bikerê. Sey avûkatanê ci ma wazenê bi xo şorê Îmrali û pê çimanê xo muwekîlê xo bivînê.''

5 serrî yo tede têkilîye nêronîyaye

Îqtîdarê AKP-MHP-Ergenekonî qestî ra nêverdeno kurdî Îmraliyî ra xeberêke bigêrê. 2016 de ra nata 4 reyî pêvînayîşê avûkatan ameyî qedexekerdene. 27ê temmuza 2011î ra nata pêvînayîşê avûkatan pê bahaneyanê 'xeripîyayîşê keştîye', 'rewşa xirabe ya hewayî' ameyêne astengkerdene. 20ê temmuza 2016î de zî Mehkemeya Înfazî ya Bursa zîyaretê keye, avûkat, wasîyan qedexe kerdî û têkilîya bi faks, telefon, mektuban zî qedexe kerde.

Waştişê Serdozgerîya Komare ya Bursa heman mehkeme 6ê êlula 2018î de derheqê Abdullah Ocalan, Hamîlî Yildirim, Omer Hayrî Konar û Veysî Aktaşî de birêka newîye daye û pêvînayîşî qasê 6 mengan qedexe kerdî. 2ê adara 2018î de ancî mehkeme pêvînayîşî qasê 6 mengan qedexe kerdî.

Bira qedexeyî 2ê nîsane de qedîyena

3ê êlula 2021î de mehkeme pêvînayîşî qasê 6 mengan qedexe kerdî. No qedexe 2ê nîsane de qedîyeno. Rayberê Şarê Kurdî Abdullah Ocalan 7ê tebaxa 2019î ra nata nêeşkeno avûkatanê xo bivîno. Keyeyê ci tewr peyên 3ê adara 2020î de şibi Îmrali. 21 serran de reya verêne û peyêne Rayberê Şarê Kurdî Abdullah Ocalanî 27ê nîsana 2020î de heqê xo yê pêvînayîşê telefonî xebitna.

Pêvînayîşo peyên ê Îmraliyî

27ê sibata 20203i de selahîyetdaranê dewleta tirke pare kerd ke Îmrali de şewat qewimîyayo. Xoverdayîşê kurdan ra dima birayê Rayberê Şarê Kurdî Abdullah Ocalanî birayê xo Mehmet Ocalan 3ê adara 2020î de dî. Rayberê Şarê Kurdî nê pêvînayîşî de wina vatbi: ''Eke şima bihêz bibê şima eşkenê her çi çareser bikerê. Şima neçare yê ke dezgehê xo bihêz bikerê. Eke şima weş bixebitê şima eşkenê netîce bigêrê. Yanî ganî şima seba şexsan ney seba şarî bixebitê. Her çi bi têkoşînî beno. Eke hêz çinbo kesêk nêeşkeno meseleya kurdî çareser bikero. Ganî şima bibê lingê hîreyînî yê masaya Tirkîya. No zî bi hêzî beno. No bi kede beno. Ez her kesî rê ke Rojawan de, Başûr de, Rojhelat de û Ewropa de vera tecrîdî têkoşîn kenê selam kena.Her çi pabesteyê têkoşînê şima yo. Eke şima aver şorê her çi çareser beno. La eke şima aver nêşorê pêro meseleyî dewam kenê. Hem tecrîd dewam keno hem zî gonîye rişîyena. Her kes ganî goreyê naye çi destê ci ra bêro wa bikero.''

Wextê caardişê azadîye

Konseya Rayberdişî ya KCKyî semedo ke serrêke ra nata Rayberîye ra xeberêke nêgirewte 10ê êlula 2020î de Hemleya 'Tecrîd, faşîzm, îşxalî rê bes o; Wext wextê azadîye yo' îlan kerde.Çarçewa hemle de her cayê dinya de çalakîyî yenê kerdene. Tepişteyê dewaya PKK û PAJKî zî na çarçewe de 27ê teşrîna peyêne ra nata vera tecrîdî grevê vêşanîye de yê. Kampa Mexmûr û Yunanîstanî de zî grevê vêşanîye dewam keno.

Rejîmo taybet ê tecrîdî yê Îmraliyî

Rayberê Şarê Kurdî 15ê sibata 1999î Komployê Mîyanneteweyî ra nata Zîndanê Îmraliyî de mîyanê sîstemê îşkence û tecrîdî yê giranî de tepişîyeno. Bi taybetî 2005 ra nata no sîstem ame girankerene.

Dewleta tirke metodanê îşkenceyî 22 serrî yo Îmrali de ana ca. Gijikê Rayberê Şarê Kurdî pê zorî ame qesnayene, dormeyê zîndanî de seba ke milçikî nêşorê serê ci darî ameyî birnayene. Heta nika 240 reyî cezaya hucreyê yewkesî dîyaye Rayberê Şarê Kurdî.

Nê sîstemî de Rayberê Şarê Kurdî de nêweşîyê sînuzît, anjîn, faranjît, alerjîk rînît û astimî virazîyayî. Rayberê Şarê Kurdî 22 serrî yo rengêk, hewa, hasmên, vengê nêdî û nêeşnawit. Rixmê hende îşkenceyan zî ey pêro pêvînayîşan de tim rayîrê çareserîye mojnayî.