Rojbîyayîşê Rayberê Şarê Kurdî abdullah Ocalanî 4ê Nîsane şaristananê Ewropa de ame fîrazkerdene.

Şaristanê Kolnî yê Almanya de Yewîya Cinîyan ê Kurdan ê Ren Vestfalya -YJK-NRWyî rojbîyayîşê Ocalanî fîraz kerd. Çarçewa fîrazkerdişî de pêramotişêk ame akerdene. Şarî eleqeyêko pîl mojna pêramotişî. Hunermend Memo şayîye de vejîya sehne ser.

Şaristanê Cenevre yê Swîsre de serkêşîya Têgêrayîşê Cinîyan ê Kurdan ê Swîsre (YJK-S) de verê Temsîlkarîya Neteweyanê Yewbîyayeyan de şayîyêke ameye kerdene. Beşdaran şayîye de waşt ke wa Abdullah Ocalan azad bo. Nameyê TJK-E ser o Zozane Serhed şayîye de qisey kerd û da zanayene ke ê do serra 2022yî bikerê serra azadîya Ocalanî. Qiseykerdişan ra dima şitilî ronîyayî û bi fransizkî vilawekî ameyî vilakerdene.

Şaristanê Marsilya yê Fransa de aktîvîstanê TCŞyî bi wesîleya rojbîyayîşê Ocalanî çalakîya rayraşîyayîşî kerde. Çalakîye de alayê PKKyî û fotografê Ocalanî ameyî akerdene. Ciwanan dima eşkerayîyêke daye.  

Şaristanê Duisburgî yê Almanya de aktîvîstanê TCŞ û TÊKO-JIN bi şîarê 'Serra serkewtişî de bêrê cengê azadîye' çalakîya rayraşîyayîşî kerde. Çalakîye de azadîya Ocalanî ameye waştene. Der û dorî zî zaf eleqe mojna çalakîye. Çalakîye pê sloganan qedîyaye