Cinîyan bi wesîleya serrgêra 5ine ya şehadetê Leyla Qasim 12ê gulane de Bruksel de ‘’Înîsîyatîfê Yewîya Neteweyî yê Cinîyan ê Kurdan ê Ewropa’’ nabi ro. Vervatoxa Înîsîyatîfê Yewîya Neteweyî yê  Cinîyan ê Kurdan ê Ewropa Şîlane Emînoglu derheqê babete de ajansê ma rê qisey kerd.

Şîlane îfade kerd ke înîsîyatîf seba ke nasname, xobîyayîş, ziwan û azadîya cinîyan bipawo ronîyayo û binê sîwana partîyêke de nîyo. Şîlane vat: ‘’Cinîyê koçberî Ewropa de hewceyê yewîye yê. Ganî cinîyî bi awankerdişê yewîye meseleyan çareser bikerê. Cinîyan têkoşînê azadîye de zaf bedelî dayî. Nê destkewteyê pîlî zî keda nê têkoşînî yê.’’

Şîlane bale ante Vengdayîşê ‘Haştîye û Komelê Demokratîkî’ yê Rayber Apoyî ser û vat: ‘’Nê vengdayîşî seba cinîyan bingeyêk û atmosferêk aferna. No têkoşîn zî bingeyê perspektîfê Rayber Apoyî de yeno kerdene. Her cinîye eşkena înîsîyatîfê ma de cabigêra. Ma bawer kenê ke cinîyî eşkenê yew bibê û hêzê xo awan bikerê. Verê ma Kurdîstan o, ma wazenê Rayberê Azadî reyde Kurdîstanê Azadî de hêzê xo yew û xurtêr bikerê.’’

Şîlane ard ziwan ke ê wazenê komxebatêke bikerê û vat: ‘’Armancê ma yo sereke awankerdişê rêxistinîtêka sîwane yo. Armancê ma ronîyayîşê konfederalîzmê cinîyan o.  Mîsyonê çareserîye yê Rayberîye rayîrê ma akerdo. Ma venga pêro cinîyan danê ke bêrê ma pîya meseleyanê xo çareser bikerê, yew bibê, têkoşînê hemparî bikerê û ser bikewê. Hêzê cinîyan est o ke ney bikerê.’’