Dewleta tirke hewce nêkena ke netîceyanê şerê qirkerdişî yê vera kurdan eşkera bikera. Têna seba propaganda tay xeberanê zûran vana. Raştîya warê şerî 35 serrî yo rayaumûmîye ra yena nimnayene. Rayaumûmîya tirkan zî hewce nêkena le malîyetê madî û manewî yê şerê 35 serran bipersa. Xîretê winasênî maruzê tedaya dewlete benê.

Dewleta tirke çend xîret bikera ke netîce û malîyetê şerî binimna zî Têgêrayîşê Azadîye yê Kurdan serebûtanê ke qewimîyenê pare keno. Bi taybetî netîceyê şero ke destpêkê serranê 2000î ra nata qewimîyeno, rixmê hende kêmasîyan zî mîyanê 6 serranê peyênan de pare keno. Bi nê hawayî babeta teda û malîyetê şerî de çimeyêko girîng ê doneyan pêşkêş keno.

Merdim eşkeno şerê Kurdîstanî û şeranê gerîlayan ê pêro dinya bîyaro verê çimanê xo vîneno ke şero tewr giran şerê Vietnamî yo. 

Şerê Vietnamî tewr tay 20 serran dewam kerd labelê şero ke Amerîka tewrê ci bîya zaf giran a. 

Ma 10 serranê şerê Vietnamî û 6 serranê peyênan ê şerê Kurdîstanî bidê têver. 10 serrê peyênî yê şerê Vietnamî wexto tewr giran bi û şerê Kurdîstanî de zî 6 serrê peyênî (2015-2021) wexto tewr giran bi.

Amerîka serra 1963î de tewra şerê Vietnamî bîye û serra 1973î de bin kewte, xo Vietnamî ra apey ant. Amerîka nê şerî de 8 mîlyon ton bombayî û 15 mîlyon ton cebilxaneyî xerc kerdî. Ame parekerdene ke malîyetê nê şerî 350 mîlyar dolar bi. Netîce û malîyetê nê şerî şarî reyde ameyî parekerdene. Bi nê hawayî şarî seba qedîyayîşê şerî tedaya hukmatî kerd.

Wexto ke merdim bala xo bido 6 serranê peyênan ê şerê qirkerdişî yê dewleta tirke vîneno ke şerê Kurdîstanî şerê Vietnamî ra giranêr o.

Goreyê Merkezê Îrtîbatî û Çapemenîye yê HPGyî doneyê temmuza 2015î ra heta teşrîna peyêne ya 2021î wina yê:

-4 hezar û 881 reyî hewayî ra ame bombakerdene û 3 hezar û 824 reyî zî bi topan erdî ra ame bombakerdene.

-Artêşa tirke nêzdîyê 4 mîlyon û 460 hezar û 614 ton bombayî şuxilnayî.

-Artêşa tirke hezar û 865 hêrişî kerdî, 6 hezar û 561 reyî şer qewimîya. Goreyê doneyanê şerî û operasyonan nêzdîyê 5 mîlyon ton cebilxaneyî şuxilîyayî.

-Hêrişanê vera Rojawanî de zî 25 mîlyon ton bombayî şuxilîyayî.

Malîyetê şerî yê 6 serranê peyênan nêzanîyeno. Labelê polîtîkaya şerî ya dewleta tirke rijnayîşê manewî reyde hetê ekonomîkî ra zî Tirkîya berd verê rijîyayîşî.