Dadîyê Nobeta Edaletî tewrê serweşîya tepişte Mehmet Sevînçî bîyî. Înîsîyatîfê Mayanê Haştîye, Komeleya Hetkarîya Keyeyanê Tepişteyan û Hukmwerdeyan a Marmara (MATUHAY-DER), Komeleya Merdimanê Vînîbîyayeyan a Anatolia (ANYAKAY-DER), Komeleya Paştdayîşê bi Keyeyanê Tepişteyan (TUHAY-DER) û Komeleya Heqanê Merdiman (ÎHD) û îdarekarê HDPyî zî tewrê serweşîye bîyî.

Dadîyanê Nobeta Edaletî ra Fîncîye Akman serweşîye de qisey kerd û îfade kerd ke çîyo ke dewlete cenazaya Sevînçî kerdo mîsalê hêrişanê vera kurdan o. Dayîke Fîncîye vat: ''Îslam de no est o? Ma têna edaletî wazenê. Zulm û zorbazîya dewlete rê bes o. Kurdî hişyar bîyî, şima se kenê bikerê ma tîya de yê û do tîya de bibê. Dewlete na ya. Tek karê dewlete no yo ke kurdan erzena zîndanan. ''