Rayberê Şarê Kurdî Abdullah Ocalanî 15ê sibata 1999î de bi Komployê Mîyanneteweyî ame esîrkerdene û Zîndanê Îmraliyî de tepişte yo. Bi taybetî 2010 ra nata tecrîdê Îmraliyî bi destê AKP-MHPyî yeno girankerdene. 27ê temmuza 2011î ra nata rejîmê Erdoganî pêvînayîşê avûkatan ê bi Ocalanî bi temamî asteng kerdî.

Têgêrayîşê Azadîye naye ser o warê dîplomasî û dîaspora de kewt mîyanê xîretan. Seba ney veng dîya Konseya Ewropa, CPT, Parlamentoyê Ewropa, Mehkemeya Heqanê Merdiman a Ewroppa û Yewîya Ewropa. Strasbourg de zî grevê vêşanî yê 5 rojan dîyabi destpêkerdene.

Dima 1ê adara 2012î de endamanê 'Înîsîyatîfê Abdullah Ocalanî rê Azadîye' Fûat Kav, Ahmet Çelîk, Mecbûre Ozer, Tarik Yûsûfî, Îmam Yildiz, Gulistane Hesen, Harûn Yilmaz, Kerîm Sîvrî, Emîne Benek, Nîgare Eneyatî, Erol Polat, Hasan Acar, Ahmet Kiliç, Oner Ûlûdag û Gonul Kaya dest pê grevê vêşanîye yê bêdem-bêagêrayîşî kerd. 30 rojan ra dima selahîyetdaranê Ewropa soz da ke peynîya tecrîdî bîyarê.

Dima zî vengdayîşê Sekreterê Pêroyî yê Konseya Ewropa, Serekê Parlamentoyê Ewropa û KCKyî ser o 15 çalakîkeran roja 52. de peynîya grevê vêşanîye ard. 

Çalakîya 25ê hezîrane hetê 4 aktîvîstan ra dîyaye destpêkerdene

25ê hezîrane 2012î de 4 kurdîstanijan warêkê nêzdîyê Konseya Ewropa de seba Abdullah Ocalanî 'Nobeta Azadîye' kerde. A roje ra nata her hewte koma bi 5-7 kesanê ke şaristananê cîya-cîyayan ê Ewropa ra yenê, tewrê nobete bena. Komme saete 01.30-17.30 de bêmabên nobete gêna. 520 hewteyan de tewr tay 3 hezar aktîvîstî tewrê nobete bîyî. Na çalakîya tewr emrderge ya ke Ewropa de yena kerdene. Heta nika na çalakîye de 300 hezar vilawekî ameyî vilakerdene.

Çalakîkeran nê 10 serran de seba azadîya Rayberê Şarê Kurdî îmzayî arê dayî, derheqê paradîgmaya ey de agahîyî dayî.

Aktîvîsta kurde Helene Dêrsima ke destpêke ra nata mîyanê organîzasyonê 'Nobeta Azadîye' de ya, derheqê girîngîya çalakîye de ANFyî rê qisey kerd.

Dêrsime ard ziwan ke tarîx de hema çalakîyêka winasêne nêameya kerdene û vat: ''Ez pê sereberz a ke mîyanê na çalakîye de ya. 10 serran de têna wextê Korona de 2 mengan ma nobeta azadîye nêkerde. Na çalakîye mabênê şarê kurdî û Rayberê înan de pirdêk o. Pêro beşdarê na çalakîye hişmend ê, zanenê ke çi wazenê. Ge ge meseleyanê weşîye ra 5 tenî nê têna 3 tenî tewrê çalakîye benê. Ma bi nê hawayî kenê ke na çalakîye dewam bikera. Eke na çalakîye ra ma netîceyêke bivisnê destî no do pê îrade û hêzê ma bibo. Çalakîye hema zî dewam kena. No zî netîceya îradeyê şarê kurdan a. Çalakîya ma dewleta tirke zî aciz kerde. Lobîya dewleta tirke tim xîret kerd ke çalakîya ma asteng bikera. La ser nêkewte.''

Çalakîkeranê verênan ê Nobeta Azadîye ra di tenî zî Rojda Emekçî û mêrdeyê ci Munzur Emekçî yê. Munzur Emekçî 2016 de nêweşîyêke ra dinyaya xo bedilneno la Rojda têkoşînî rê dewam kena.

Rojda bale ante zor û zehmetîyanê verênen ser û vat: ''Ma vat 'Azadîya Serek Apoyî azadîya ma ya' û ma dest pê çalakîye kerd. Mi û embaz Munzur ma na çalakîye xo rê kerde meseleya rûmetî. Ma vat ke eke çew zî tewrê ci nêbo ma do heta peynî bikerê. Tayênan vatêne ke na çalakîye çalakîya ma ya şexsî ya. Tayê bînan vatêne 'şima heta şanî tîya de yê, do se bibo?' Tayê xerîban zî vatêne 'Çi gureyê şima tîya de est o, şorê welatê xo de çalakîye bikerê.' La hem şarê ma paştdayîşêko pîl da ma, hem zî bi qiseykerdişê xerîban ma fikrê înan vurna.''