DEM Partî bi wesîleya 15ê Gulane Roşanê Ziwanê Kurdkî Colemêrg û qezaya ci Şemzînan de bi hewayêkê hemwextî eşkerayîye daye. Wird eşkerayîyan de zî ame waştene ke wa kurdkî bibo ziwanê perwerdeyî û bibo wayîrê statuyî.

Çalakîya Colemêrgî de pankartê “Statuye Kurdî, perwerdehiya bi Kurdî” ame akerdene û slogana“Bê ziman jiyan nabe” ameye vatene.

Eşkerayîye de ame vîrvistene ke bi mîlyonan domanê kurdan heqê perwerdeyê dayîke ra mehrum yenê verdayene û ame vatene ke heta heqê kurdan ê bingeyî bi qanûnan bigerîyê binê asayîşî têkoşîn do dewam bikero. Eşkerayîye bi deyîranê kurdkî û govende qedîyaye.

Eşkerayîya Şemzînanî de zî dovîzê "Dem dema Kurdîye", "Ziman rûmet e" û "Kurdi biaxivin, bixwunin û binivîsin" ameyî kiriştene. Tewrbîyayoxan bi kincanê herêmî û şal û şapikan bale ante xo ser. Badê wendişê eşkerayîye çalakîye bi slogana“Bê ziman jiyan nabe” qedîyaye.