Amed de bi armancê çareserîya demokratîke ya meseleya kurdan ‘’Înîsîyatîfê Yewîya Demokratîke’’ amebi ronayene. Serekê Baroyê Amedî yê verên û endamê înîsîyatîfî Nahît Erenî ajansê ma rê qisey kerd.

Nahît Erenî bale ante bira çekverdayîşî ya PKKyî ser û vat: ‘’Hinî ganî dewlete game bierza. Ganî hişmendîya îdareyê zorbazî û tûjî yo ke bi polîtîkayanê asayîşî ronîyayo, werte ra bêro wedaritene. Ganî qanûno bingeyî yo newe bivurîyo hempeymana komelkî ke pêro nasnameyan temsîl bikero.

Proseso ke bi eşkerayîyanê Bahçelîyî dest pêkerd mojneno ke ma kewtê dewrêkê cîyayî. Biranê kongreya PKKyî zî rewşêka pozîtîfe viraşte.. Na rewşe seba çareserîya mesele zerrîya komelî weş kerde.’’

Erenî îfade kerd ke ganî sîstemê huqûqî yê Tirkîya newe ra bêro ercnayene û vat: ‘’Bi taybetî warê perwerdeyê bi ziwanê dayîke, heqanê şexsîyan de ganî qanûnî bêrê sereraştkerdene.’’

Erenî da zanayene ke girîng o ke aktorê prosesê çareserîye bieşkê rolê xo bîyarê ca û vat: ‘’Ganî hinî gamê neweyî bêrê eştene. Eke çekî bêveng bîyê ganî ferasetê îdareyê tûjî û zorbazî zî ganî biqedo. Ganî seba ney qanûnî bêrê viraştene. Ganî qanûno bingeyî yo newe pêro nasnameyan xo rê bikero esas. Seba vurîyayîşê qanûnî ganî amadekarîyê cidîyî bêrê kerdene.’’