Koordînatora Merkezê Cigêrayîşê Warê Sosyo Polîtîkî Yuksel Genç vat cigêrayîşanê warî de yeno vînayene ke şar gama pête paweno.

Yuksele Genç ard ziwan ke netîceya cigêrayîşanê înan ke destpêkerdişê prosesî ra nata dewam kenê, şarî de hîrê vînayîşî vejîyenê werte û wina dewam kerd: ''Nînan ra verêne no yo; 'Rayber Apo û dewlete xora çarçeweyanê bewlîkerdeyan de kerdo pêsere, her çî rayîr de yo,' yê diyînî; 'ma bipawê û bivînê' û hîrêyinî zî; ê ke prosesî rê 'bawer nêkenê.'

 Despêkerdişê prosesî de şarî zaf qesawet kerdêne.  Çunke heta nika pêro prosesan de tecrubeyo ke vejîya werte o yo ke dewlete tim kayan kay kena. Yewî zî nê 41 serranê têkoşînî de senî ke yeno zanayene ra zafêr şar PKKyî sey pawitoxê xo vîneno. Nê semedî ra fîkrê feskerdiş, çekeronayîşî moralê şarî xeripna.  Seke prosesî dest pêkerd di ganê girdî ameyî eştene. Vengdayîş û deklarasyonê Birêz Ocalanî û netîceya kongreya PKKyî. Nê gamî zaf cesûr û stratejîk bî. La vera nê gaman dewlete hema gamêka pête nêeşta. Nê semedî ra komel qerqilîyeno.

Şarê kurdî gama pête paweno. Xora şar hinî goş qala nêkewno, vatişanê îqtîdarî ra nêxapîyeno ke xora çîyêko rind zî nêvato. Şar nêewnîyeno vatişî ra, ewnîyeno kerdişî ra. Şar vano wa dewlete çi kena wa vajo, ma bivînê. Yew zî komelê Tirkîya de zî semedê prosesê haştîye hazirîya xo nêkeno. Semedê nê gerek ziwanê sîyasetî, komelê sîvîlî û medya bêro bedilnayene. Semedê nê zî zaf çî hewce nêkeno. Têna gerek dewlete bikewo pradîgmaya haştîye.''