Bi wesîleya serrgêra Qirkerdişê Sêwasî  bi çalakîyan waştişê caardişê edaletî ame ziwan û şehîdê qirkerdişî ameyî yadkerdene.

Amed: Hetê Platformê Şubeyanê KESKî yê Amedî ra banê Egîtîm Senî de eşkerayîye ameye dayene. Eşkerayîye de ame vîrvistene ke badê Qirkerdişê Sêwasî temsîlkarê waybiratîye û haştîye Hrant Dînk û Tahîr Elçî zî ameyî qetilkerdene ke û ame vatene ke  ê do memosê qirkerdişan û, xo vîr a nêkerê û nêdê vîrakerdene. Eşkerayîye de şehîdê qirkerdişî bi hurmet ameyî yadkerdene û ame vatene ke bi ronayîşê welatê waybiratîye û keye do hesabê qirkerdişî  bêro persayene.

Dêrsim: Hêzanê Kede û Demokrasîyî yê Dêrsimî Kuçeyê Sanatî de eşkerayîye daye. Eşkerayîye de ame vatene ke Qirkerdişê Sêwasî hetê serdestan ra ame organîzekerdene û kiştoxan zî ard ca. Eşkerayîye de bale ameye ser antene ke dewlete senî kiştoxan pawena ser û ame vatene ke tay kiştoxî qet Sêwasî ra nêvejîyayî û cuya xo rê normal dewam kerde. Çalakîye de êyê ke ameyî qetilkerdene bi heskerdiş ameyî yadkerdene û ame vatene ke  ê do rayîrê înan de şirê û çilayê Sêwasî nêdê hewnakerdene.

Çewlîg: Verê banê HDPyî de bi tewrbîyayîşê Wekîlê HDPyî yê Çewlîgî Erdal Aydemîrî eşkerayîye ameye dayene. Eşkerayîye de vera qirkerdişî nêrazîbîyayîş ame ramojanyene û na roja qirkerdişî sey roja tarîye ameye namekerdene. Eşkerayîye de Qirkerdişê Sêwasî sey hêrişê vera waybiratîya şaran ame hesibnayene û ame vatene ke herinda kiştoxan ra hesabpersayîşî de verê qirkerdişanê neweyan yeno akerdene. Eşkerayîye de ame waştene ke waştişê elewîyan û heme grûbanê bînan ê bawerî bêro caardene û Madimak bibo muzeyê şermî.

Reyna Îstanbul, Zonguldak, Mersin, Hatay û xeylêk bajaranê bînan ê Kurdîstan û Tirkîya de semedê şermezarkerdişê Qirkerdişê Sêwasî çalakîyî ameyî kerdene. Çalakîyan de ame vatene ke qirkerdiş pê destê dewlete ame kerdene û sozê hesabpersayîşî ame dayene.