Têgêrayîşê Cinîyan ê Azadan (TJA) 31ê gulane de, Amed de bi beşdarîya bi hezaran cinîyan ‘Rayraşîyayîşê Haştîya Komelkîye’ do bikero. Rayraşîyayîş de cinîyî waştişanê xo yê haştîye û komelê demokratîkî do bîyarê ziwanî. Aktîvîsta TJA Arzu Karaman derheqê babete de ajansê ma rê qisey kerd.

Arzu pare kerd ke seba haştîye serkêşîya cinîyan girîng a û vat: ‘’27ê sibate de bi vengdayîşê Rayber Apoyî prosesêk dest pêkerd. Ma wayîrê nê prosesî vejîyenê. Şer tewr zaf tesîrê cinîyan keno; coka tewr zaf cinîyî hewceyê haştî û komelê demokratîkî yê. Ganî dewlete nê prosesî de goş bida waştişanê şarî. 

Ma venga pêro cinîyan ê Tirkîya û Kurdîstanî danê ke tewrê nê rayraşîyayîşî bibê. Zaf girîng o ke cinîyî serkêşîya nê prosesî bikerê. Ma do pîya vengê xo berz bikerê û wayîrê haştî û demokrasîyî vejîyê. Ma sey cinîyan komelê demokratîkî û haştîye xo rê kenê esas.’’