Konferansê Wekîlan ê Cinîyan ê Kurdan o 1in Amed de serkêşîya TJA de, bi şîarê ‘Ma sîyasetî demokratîk bikerê, komelê demokratîkî awan bikerê’ yeno kerdene. 

Beşdaranê konferansî ra Wekîla DEM Partî ya Mêrdînî Salîha Aydenîz û Wekîla Parlamentoyê Başûrê Kurdîstanî Mahabade Mihemed ajansê ma rê qisey kerd.

Salîha Aydenîz vat: ‘’Nê konferansî de her hetê Kurdîstanî û dinya ra cinîyê kurdî est ê. Dinya de cinîyî tim raştê teda, şîdet ûsn. yenê. Cinîyê kurdî hema cinîtîye ra hem zî kurdayetîye ra raştê teda û şîdetî yenê. Xêrê têkoşînê cinîyan ra ma ewro tîya de yê. Seba vurnayîş, pîyakerdiş û rêxistinkerdişê nê têkoşînî no konferans girîng o. Vengdayîşê Haştîye û Komelê Demokratîkî yê Birêz Ocalanî rojdemanê bingeyînan ê nê konferansî ra yew o.  No konferans do seba serkêşîya cinîyan a têkoşînê azadîye girîng o.’’  

Mahabade Mihemed vat: ‘’Konferans de babetê haştîye, demokrasî û yewîye esas ê. Têkoşînê demokrasî û haştîye yê Vakurê Kurdîstanî de rolê cinîyan tim serkêş bi. No têkoşîn dewam keno. Cinîyî ganî hîna bi aktîfî tewrê mekanîzmayanê qerardayîşî bibê. Netîceyê nê konferansî hem Vakur de hem zî Başûr de cinîyan rê bibê çimeyê îstîfadekerdişî. No konferans heman wextî de do zemînê yewîye xurtêr bikero.’’