Ronayoxanê PKKyî ra Duran Kalkanî ajansê ma rê qalê rojdemî kerd.

Ercnayîşê Kalkanî wina yê:

‘’Bi vengdayîşê Devlet Bahçelîyî Rayber Apoyî reyde teşrîna verêne de pêvînayîş ame kerdene. Dima Rayber Apoyî vengdayîşan ser o înîsîyatîf girewt û Vengdayîşê Haştîye û Komelê Demokratîkî kerd. 

PKK tena rêxistinêko çekdar ney têgêrayîşêko komelkî yo. PKK wayîrê tarîxî vejîya û nê mîrasî ser o têkoşîn kerd. Ewro PKKyî xo û dormeyê xo vurna. PKKyî nê zî goreyê şertanê dewrî kerd. PKK 48 serrî yo têkoşînê çekdarî keno. Tayê vanê ke çira PKK çekan war verdeno. Madêm hendê meraqê çekan gênê, wa bigêrê xo destî. Wa çew derse nêdo PKKyî. Nîsbetê şorişgêrîye hetê asta îdeolojî ra yeno dîyarkerdene. Şîdet ney. 

PKK ho awanîya xo ya streyetîke, taktîk, teorîke vurneno. Bi erkanê neweyan xora awanîya rêxistinîye do dewam bikera. PKKyî stratejîya şerê felata neteweyîye vurna û herinda ci de stratejîya sîyasetê demokratîkî keno. No vurnayîşê paradîgma 2004 ra nata yeno kerdene. 

Xora verê prosesî de astengîyî zî est ê. Erdogan hema zî bi çekuya ‘terorî’ qal keno. CHP goreyê AKPyî mesele ser o hîna hesas o la ganî hîna zaf xîret bimojno.

Bira feshkerdişî ra dima tayê dormeyî kewtî panîk û înan kerd ke verê ney bigêrê. Nê dormeyî şerî ra rant wenê. 48 serrî yo PKK şer keno la nê dormeyan heta nika paştî nêdabî ma. Ê kesanê ke seba Rayber Apoyî vatêne ‘hacetê hêzanê teberî’ nê nika zî seba Rayber Apoyî vanê O teslîm bîyo. La Rayber Apoyî tim haştîye û çareserîye rê xîret kerd. 

Têgêrayîşê Kemalîstan Peymana Lozanî de Mîsaki Mîllî ra îltîmasî dayî. Bi Peymana Lozanî Kurdîstan ame parçekerdene. LA seke kurdî sûcdarê ney ê yenê mojnayene. Xora bi Peymana Lozanî sozê ke dîyabî kurdan ameyê binpaykerdene. Şêx Seîdî naye ser o sere wedarit. Tayê kesan vato ke PKKyî kongreya xo de çira qalê Peymana Lozanî kerdo. Heta ke çew vizêrî de têrî nêbo nêeşkeno biewno vernîya xo ra. Peymana Lozanî esasê tirkbîyayîşî de ameya viraştene. Ma no rexne kerd.

Mabênê kurdan û dewleta tirke de meseleya bawerîye est a ke 200 serrî ya. Heta ke dewlete feraset û sîyasetê xo verê kurdan de nêvura kurdî do bawerê dewlete nêkerê. Ganî dewlete hinî kurdan rê tirkbîyayîş ferz nêkera. Kurdan destê dewlete ra zaf zulm dî. 

Seba ke na bêbawerîye bêra wedaritene, kurdî dewlete ra bawer bikerê ganî feraset bêro vurnayene. Ganî qiseyê sey ‘Bela, teror’ ra fek vera bêro dayene. Medya bi xo destê îqtîdarî de ya. Eke medya wina qisey kena no mojneno ke ferasetê îqtîdarî senîn o.

Seba demokratîkbîyayîş zemînoı huqûqî şert o. Ney zî îqtîdar û dewlete eşkenê bikerê. Kongreya ma ra dima îdarekaranê AKPyî vat ke qesawetê înan est o. Qesawetê kurdan zî est o. Kurdî 200 serrî yo yenê qirkerdene. Şarê kurdî qerqilîyeno ke eke PKK çekan war verdo senî verê qirkerdişî de xo bipawo.

Bîyo 3 hewteyî ke ma kongre kerde. La hema zî îqtîdarî gamêka pozîtîfe nêeşte. Ne qanûnêk vejîya ne zî çîyêko bîn. Bahçelî weş qisey kena la tena qisey keno. Çareserîya meseleya kurdan hacetê îqtîdarbîyayîşî nîya. Seba çareserîye ganî her kes bêro tewrkerdene. Seba ke birê kongre bêrê caardene ganî Rayber Apo azad bibo. Îqtîdar vano ‘Şima teslîm bibê.’ La hesasîyetê şarê kurdî est ê. 

Kurdî zî çareserîye wazenê. Heta ke meseleya kurdan çareser nêba Tirkîya zî demokratîk nêbena. Verê Tirkîya de tehlukeyê ke teberî ra yenê est ê. Ma vurîyayîş de isrardar ê. Kam ma de îtîfaq bikero ma do ci rê mutefîq û dost bibê. 

Vurîyayîşê paradîgma şert o. La gamê pratîkî çin ê. Hema zî îqtîdarî seba ke şar bawerîya prosesî bikero gamêke nêeşte. Proses tena bi xîretê yew hetî yan zî bi eşkerayîyan aver nêşino. Ganî wird hetî zî game bierzê.’’