Çawişê pisporî Musa Orhanî tecawuzê Îpeke Era 18 serrî kerdibi. Îpeke Er xo kiştibî. Mektuba ke aye peyê xo de verdabi ser o derheqê Musa Orhanî de dewa amebî akerdene.

Ewro roniştişê dewa ame kerdene. Orhan tewrê mehkeme nêbi. Keyeyê Îpeke, avûkatî, têgêrayîşê cinîyan û xeylê kesê bînî tewrê mehkeme bîyî.

Babî Fuat Erî da zanayene ke Orhanî keyeyê ci tehdît kerdo. Dadîye Hîkmete Er da zanayene ke kênaya ci vato: ‘’Ey madeya kundoxî daye mi, tecawuzê mi kerd û bi fotografanê mi ez tehdît kerda.’’

Şahîdan ra doktorêkî zî vat ke Îpeke Er hema ke nêmerdibî înan rê vato ke Musa Orhanî tecawuzê aye kerdo.

Keyeyî û avûkatan waşt ke wa Orhan bitepişîyo.

Dozgerî bire daye ke Komeleya Cinîyan a Rosa tewra roniştişî biba, çawişê pisporî Suat I. Û Sedar O., xebatkarê weşîye O.C. û F.D. û birayê Îpeke Hakan Er sey şahîdan tewrê roniştişî bibê.

Mehkeme nê waştişê dozgerî qebul kerd la tepişîyayîşê Orhanî red kerd. Roniştiş taloqê 16ê teşrîna verêne ame kerdene.