Merkezê Kongre yê Amedî de Konferansê Wekîlan ê Cinîyan ê Kurdan o Yewin yeno kerdene. Konferansê bi şîarê ‘’Ma sîyasetî demokratîk bikerê, komelê demokratîkî înşa bikerê’ do di rojan dewam bikero. Kurdîstan, Ewropa û Rojhelatê Mîyanênî ra xeylê wekîlê cinîyî yê kurdî tewrê konferansî bîyî.

Konferans de hêverî Hemsereka Înîsîyatîfê Yewîya Demokratîke Gulcane Kaçmaz Sayyîgît qisey kerd. 

Gulcane vat: ‘’Cinîyan ê kurdan têkoşîno xurt kerd, bedelê pîlî dayî. Ewro ma seba caardişê yewîya cinîyan ê kurdan tîya de yê.Şîarê ‘Jin, Jiyan, Azadî’ ewro pêro dinya de vengê cinîyan ê kurdan dano eşnawitene. Xoverdayîşê cinîyan ê kurdan do dewam bikero. Birêz Ocalanî wexto ke Vengdayîşê Haştîye û  Komelê Demokratîkî kerd pêro dinya de veng vet. Ganî ma seba caardişê komelê demokratîkî bixebitê. Ma ganî wayîrê biranê nê konferansî vejîyê, serdestîya camêrdan parçe bikerê, yewîya cinîyan ê kurdan bîyarê ca.’’

Hemsereka KCDyî Leyla Guvena ke tepişte ya, mesajêk şawit konferansî. Endama TJA Mizgîne Irgat mesaj wend. Mesaj de ame parekerdene ke ganî Şorişê Cinîyan ê Rojawanî pêro dinya rê bibo nimûne. Leyla îfade kerd ke cinîyan rê edalet û wijdan lazim ê coka ganî cinîyî paştî bidê yewbînan û biranê radîkalan bigêrê. Leyla pare kerd ke bi zanistê Jineolojî ganî hem asta mîyanneteweyîye hem zî asta neteweyîye de cinîyî bi kulturê xo plansazîyanê xo bikerê. Leyla vat: ‘’Ma sey cinîyan ê kurdan bişens ê. Çunke embazê ma sey Birêz Ocalanî est o. Ey ma bi xo dayî şinasnayene. Ez pê bawer a ke konferans do serkewte bo û rayîrê dewrê neweyî abikero.’’