Amed de  bi şîarê “Cinîyî bi waştişê haştîya komelkîye û çareserîya demokratîke rayra şinê” rayraşîyayîşêk ame kerdene. Hemsereka Pêroyî ya DEM Partî Tulaye Hatimogullari çalakîye de qisey kerd.

Tulaye Hatimogullari ard ziwan ke cinîyî çar hetanê Tirkîya ra semedê haştîye Amed de ameyî têhet û nê vatî: “Ma semedê haştîye tîya de yê. Komelo demokratîk semedê cinîyan zaf muhîm o û no gure bê ma nêbeno. Her hetê dinya ra cinîyan paştî daye vengdayîşê Haştîye û Komelê Demokratîkî yê Birêz Ocalanî. Ma cinîyî şer û pêkerdişan de tewr zaf dej ancenê.Cinîyî wextanê pêkewtişan de têkoşînê şarê xo rayra benê. Seba ke ma heqanê xo wazenê ma ra vanê  ‘terorîst’ la ma nînan qebul nêkenê. Têgêrayîşê cinîyan ê kurdan û têgêrayîşê cinîyan ê Tirkîya bi paştdayîşê yewbînan heta ewro ameyî. 

Wa pêro bizanê ke ma cinîyî do miheqeq haştîye na herre de înşa bikerê. Komîsyono ke meclîs de do bêro ronayene gerek cinîyî tede ca bîgîrê. Heme renganê Tirkîya ra gerek cinîyî miheqeq bibî. Lingêka nê parlemento yo la linga tewr muhîm komel bi xo yo. Ma hazir ê ke pêro pîya komelê demokratîkî înşa bikerê. 

Pêvînayîşê peyênî de Birêz Ocalanî her keso ke semedê haştîye û komelê demokratîkî gureyeno ci rê selam û heskerdişê xo şawit. Ma zî meydanê Amedî ra pêro pîya bi çapik û tîlîlîyan selam û heskerdişê xo bişawê? Semedê înşakerdişê cuyêka bêşîdetî,vergirewtişê qirkerdişê cinîyan ma na herre de haştîye wazenê. Seba ke meseleya kurdan bêro çareserkerdene ma na herre de haştîye wazenê. Bi nê hîsan û fıkran ma reyna vanê; cinî, cuye azadîye.”

Çalakîye bi slogananê  “Jin,jiyan, azadî” qedîyaye.