Rêxistina Riha ya DEM Partî Kongreya 1ine qezaya Xelîlîye de kerde. Hemsereka DEM Partî Tulaye Hatîmogullari, Wekîlê DEM Partî yê Riha Omer Ocalan, Ferît Şenyaşar, Dîlane Kunt Ayan, Mîthat Sancar, endamê Meclîsê Mayanê Haştîye û birayê Rayber Apoyî Mehmet Ocalan tewrê kongre bîyî.

Salona kongre de fotografê Rayber Apoyî, Riza Altn, Alî Haydar Kaytan û Sirri Sureyya Onderî ameyî daliqnayene.

Wekîl Omer Ocalanî kongre de îfade kerd ke seba haştîye goş û çimê her kesî Rayber Apoyî ser de yê.

Mîthat Sancarî da zanayene ke seba prosesî ganî kede bêra dayene ke wa verê rayîrê haştîya mende bêro akerdene.

Tulaye Hatîmogullari bale ante ser ke Vengdayîşê Haştîye û Komelê Demokratîkî yê Rayber Apoyî vengêko pîl veto û ganî her kes seba caardişê nê vengdayîşî têbigêro. Tulaye Hatîmogullari  pare kerd ke hukmat derheqê prosesî de gamanê hewceyan nêerzeno û vat: ‘’Wext wextê kerdişî yo, wextê qiseyî nîyo.’’

Tulaye vera paketa muhakemekerdişî ya newîye nêrazîbîyayîşê xo mojna û vat: ‘’Pakete de ca nêdîyayo waştişanê ma. Zîndanan de tepişteyê nêweşê giranî est ê. Haştîye no qayde do senî bêra? Seba haştîye kede, bername û xîret lazim ê.’’

Dima mesajê tepişteyan ame wendene.

Kongre de Ayşe Surucu û Nîhat Demîrbîleklî sey hemserekanê neweyan ê Riha ameyî weçînayene.

Kongre bi deyîranê Hozan Servanî qedîyaye.